ଭୁବନେଶ୍ବର: ସରକାରୀ ଓକିଲ ପଦବୀ ନିଯୁକ୍ତି ପାଇଁ ଯୋଗ୍ୟତାରେ ପକ୍ଷପାତିତା କରାଯାଉଛି । ଏଭଳି ସାଙ୍ଗାତିକ ଆଭିଯୋଗ ଆଣି ପ୍ରତିବାଦ କଲେ ଉତ୍କଳ ବିଶ୍ୱବିଦ୍ୟାଳୟର ଆଇନ ଛାତ୍ରଛାତ୍ରୀ । ଏନେଇ ବିଶ୍ଵବିଦ୍ୟାଳୟ ସମ୍ମୁଖରେ ହାତରେ ପ୍ଲାକାର୍ଡ଼ ଧରି ବିକ୍ଷୋଭ ପ୍ରଦର୍ଶନ କରିଛନ୍ତି ଛାତ୍ରଛାତ୍ରୀ ।
କୋରୋନା ଯୋଗୁଁ ସବୁଆଡେ ଲକଡାଉନ ସଟଡାଉନ ଜାରି ରହିଥିବା ବେଳେ କୋର୍ଟ କଚେରୀ ମଧ୍ୟ ବନ୍ଦ ରହିଥିଲା । ଏହି ସମୟରେ ରାଜ୍ୟ ସରକାର ଲୋକସେବା ଆୟୋଗ କଟକ ମାଧ୍ୟମରେ ୪୬ ଟି ସହକାରୀ ସରକାରୀ ଓକିଲ ପଦବୀ ପାଇଁ ୨୦୧୧-୨୨ ନିଯୁକ୍ତି ପ୍ରକ୍ରିୟା ଆରମ୍ଭ କରିଥିଲେ। ଯାହା ଅତ୍ୟନ୍ତ ସ୍ୱାଗତ ଯୋଗ୍ୟ । କିନ୍ତୁ ଦୁଃଖର ବିଷୟ ଏଥିରେ ଯୋଗ୍ୟତା ମାନଦଣ୍ଡରେ ପକ୍ଷପାତିତା କରାଯାଇଛି । କାରଣ ପାଞ୍ଚ ବର୍ଷ ପୂର୍ବରୁ ୨୦୧୬ -୧୭ ମସିହାରେ ଯେତେବେଳେ ବିଜ୍ଞାପନ ଏହି ପଦବୀ ପାଇଁ ବାହାରିଥିଲା ସେତେବେଳେ ଯୋଗ୍ୟତା ମାନଦଣ୍ଡ ଯେକୌଣସି ଆଇନ ଡିଗ୍ରୀଧାରୀ ସ୍ନାତକ ଥିଲା । କିନ୍ତୁ ପାଞ୍ଚ ବର୍ଷ ପରେ ପରବର୍ତ୍ତୀ ବିଜ୍ଞାପନ ବାହାରିଛି ଯେଉଁଥିରେ କି ଅତିରିକ୍ତ ଭାବେ ଦୁଇ ବର୍ଷର ଓକିଲାତି ଅଭିଜ୍ଞତା ଆବଶ୍ୟକ। ଯାହାକୁ ନେଇ ବିକ୍ଷୋଭ କରିଛନ୍ତି ଆଇନ ଛାତ୍ରଛାତ୍ରୀ ।
ତେବେ ଏଥିରେ ଯୋଗ୍ୟତାରେ ପକ୍ଷପାତିତା କରାଯାଉଛି ଏବଂ ପୂର୍ବଭଳି ଏଥର ମଧ୍ୟ ଯୋଗ୍ୟତା ଆଇନ ଡିଗ୍ରୀଧାରୀ ସ୍ନାତକ ରହୁ ଏବଂ ସମସ୍ତଙ୍କୁ ସମାନ ଅଧିକାର ଦିଆଯାଉ ବୋଲି ଦାବି କରିଛନ୍ତି ଆଇନ ଛାତ୍ରଛାତ୍ରୀ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
