ଭୁବନେଶ୍ବର: ରାଜ୍ୟର ପାଞ୍ଚଟି ନଦୀର ଜଳ ପ୍ରଦୂଷିତ ହୋଇ ଜହର ପାଲଟିଛି । ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଦ୍ଵାରା ଜଳର ମାନ ପରୀକ୍ଷଣରୁ ଏହି ତଥ୍ୟ ଆସିଛି । ମହାନଦୀର ଦୁଇଟି, ସଙ୍ଖ ନଦୀର ଗୋଟିଏ, କୋଏଲ ନଦୀର ଗୋଟିଏ, ବ୍ରାହ୍ମଣୀ ନଦୀର ଚାରୋଟି ଏବଂ ବୈତରଣୀ ନଦୀର ତିନୋଟି ସ୍ଥାନରେ ନଦୀ ଜଳ ପ୍ରଦୂଷିତ ହେଉଛି । ଆଜି ବିଧାନସଭାରେ ବିଜେପି ବିଧାୟକ ମୋହନ ମାଝୀଙ୍କ ଏକ ଲିକ୍ଷିତ ପ୍ରଶ୍ନର ଉତ୍ତରରେ ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ଏହି ସୂଚନା ଦେଇଛନ୍ତି ।
କଟକ ଓ ସମ୍ବଲପୁର ସହରର ପରିତ୍ୟକ୍ତ ପାଣିରୁ ମହାନଦୀ ପ୍ରଦୂଷିତ ହେଉଛି । ମନୁଷ୍ୟକୃତ କାରଣରୁ ସଙ୍ଖ ଓ କୋଏଲ ନଦୀ ବି ପ୍ରଦୂଷିତ ଏବଂ ଏହା ପାନୀୟ ଉପଯୋଗୀ ନୁହେଁ । ରାଉରକେଲା ସହରର ପରିତ୍ୟକ୍ତ ପାଣି ଓ ଷ୍ଟିଲ ପ୍ଲାଣ୍ଟର ବର୍ଜ୍ୟବସ୍ତୁ ଯୋଗୁଁ ବ୍ରାହ୍ମଣୀ ନଦୀ ପ୍ରଦୂଷିତ ହୋଇଯାଇଛି ।
ଏହାସହ ମନୁଷ୍ୟକୃତ କାରଣ ଯୋଗୁଁ ବୈତରଣୀ ପ୍ରଦୂଷିତ ହୋଇଥିବା ମନ୍ତ୍ରୀ ଗୃହରେ ସ୍ବୀକାର କରିଛନ୍ତି ।
ଭୁବେନେଶ୍ବରରୁ ଅଜିତ ଦାସ, ଇଟିଭି ଭାରତ
