ଭୁବନେଶ୍ବର: ବିଧାନସଭା ଘେରାଉ କରିବ କେନ୍ଦ୍ରୀୟ ଟ୍ରେଡ଼ ୟୁନିଅନ ମିଳିତ ମଞ୍ଚ । ଏନଟିପିସି ତାଳଚେର ଥର୍ମାଲ ପ୍ଲାଣ୍ଟ ବନ୍ଦ କରିବା ନିଷ୍ପତି ବିରୋଧରେ ଆସନ୍ତା ମାର୍ଚ୍ଚ ୧୫ରେ କେନ୍ଦ୍ରୀୟ ଟ୍ରେଡ଼ ୟୁନିଅନ ମିଳିତ ମଞ୍ଚ ବିଧାନସଭା ଘେରାଉ କରିବ ।
କେନ୍ଦ୍ରୀୟ ଟ୍ରେଡ଼ ୟୁନିଅନ ମିଳିତ ମଞ୍ଚ ମାର୍ଚ୍ଚ ୧୫ରେ ବିଧାନସଭା ଘେରାଉ କରିବେ। ଏନଟିପିସି ତାଳଚେର ଥର୍ମାଲ ପ୍ଲାଣ୍ଟ ବନ୍ଦ କରିବାକୁ ନେଇ ମିଳିତ ମଞ୍ଚ ଏହି ନିଷ୍ପତ୍ତି ନେଇଛି । ଆଜି ଏନେଇ ଭୁବନେଶ୍ବରରେ ହୋଇଥିବା ସାମ୍ବାଦିକ ସମ୍ମିଳନୀରେ ମଞ୍ଚ ପକ୍ଷରୁ ସୂଚନା ଦିଆଯାଇଛି । ଏନଟିପିସି ତାଳଚେର ଥର୍ମାଲ ପ୍ଲାଣ୍ଟ ବନ୍ଦ କରିବା ନିଷ୍ପତିକୁ ବିରୋଧ କରି ୮ ଟି ସଂଗଠନ ପକ୍ଷରୁ ଏହି ନିଷ୍ପତ୍ତି ନିଆଯାଇଛି । ଏହାସହ ତାଳଚେରରେ ପ୍ରସ୍ତାବିତ ୨ଟି ନୂତନ ୬୬୦ ମେଗାୱାଟର ୟୁନିଟ ନିର୍ମାଣ ପାଇଁ ମଧ୍ୟ ମଞ୍ଚ ଦାବି କରିଛି । ଆମ ରାଜ୍ୟର ବିଦ୍ୟୁତ ଚାହିଦାକୁ ନେଇ ୧୯୬୪ ମସିହାରେ ତାଳଚେର ଥର୍ମାଲ ପ୍ଲାଣ୍ଟ ତିଆରି କରାଯାଇଥିଲା । ୧୯୯୫ରେ ଏହାକୁ ଏନଟିପିସିକୁ ଦିଆଯାଇଥିଲା । ଏହା ଦ୍ବାରା ୨୦୦୦ ଠିକା କର୍ମଚାରୀଙ୍କୁ ନିଯୁକ୍ତି ସମେତ ପାରିପାର୍ଶିକର ବିକାଶ ହୋଇପାରୁଛି । କିନ୍ତୁ ଏହାକୁ ଏବେ ପ୍ରଦୂଷଣ ଓ ସୁରକ୍ଷା ଦୃଷ୍ଟିରୁ ବିଭିନ୍ନ ଆଳ ଦେଖାଇ ବନ୍ଦ କରିବାକୁ ବସିଛନ୍ତି କର୍ତ୍ତୃପକ୍ଷ । ଖାଲି ସେତିକି ନୁହେଁ ୪ବର୍ଷ ପୂର୍ବେ ୧୦ ହଜାର କୋଟି ଟଙ୍କାର ମେଗାୱାଟ ୟୁନିଟ ଏଯାବତ ସରକାର ବି କରୁନାହାଁନ୍ତି । କେନ୍ଦ୍ର ଓ ରାଜ୍ୟ ସରକାରଙ୍କ ଏହି ଅପାରଗତାକୁ ନେଇ ଅନେକ କର୍ମଚାରୀ ଚାକିରୀ ବି ହରାଇଛନ୍ତି ।
ତେଣୁ କର୍ମଚାରୀ ଓ ସ୍ଥାନୀୟ ଲୋକମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ପ୍ଲାଣ୍ଟଟିକୁ ବନ୍ଦ ନକରି ସରକାର ନୂତନ ୟୁନିଟର କାର୍ଯ୍ୟ ଶେଷ କରନ୍ତୁ ବୋଲି ମଞ୍ଚ ଦାବି କରିଛି । ତେବେ ଆଗାମୀ ଦିନରେ ଯଦି ଏହି ପ୍ରସଙ୍ଗରେ କୌଣସି କାର୍ଯ୍ୟାନୁଷ୍ଠାନ ନ ହୁଅ ତେବେ ଆନ୍ଦୋଳନ ଜୋରଦାର ହେବ ବୋଲି ସଂଘ କହିଛି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
