ଭୁବନେଶ୍ବର: ଦେଶରେ ବିଭିନ୍ନ କାରଣରୁ ହାତୀ ଓ ମଣିଷଙ୍କ ମଧ୍ୟରେ ସଂଘର୍ଷ ବୃଦ୍ଧି ପାଇବାରେ ଲାଗିଛି । ଯାହାକୁ ନେଇ ଓଡ଼ିଶାରେ ମଧ୍ୟ ଅନେକ ଘଟଣା ଘଟିଛି । ଯାହା ଚିନ୍ତାଜନକ ହୋଇଥିବା ବେଳେ ରାଜ୍ୟ ସରକାର ଏନେଇ ତତ୍ପରତା ପ୍ରକାଶ କରିଛନ୍ତି । ଏନେଇ ଗଞ୍ଜାମ ଓ କନ୍ଧମାଳ ଜିଲ୍ଲାର ବ୍ରହ୍ମପୁର ଓ ଫୁଲବାଣୀ ମଧ୍ୟବର୍ତ୍ତୀ ଅଞ୍ଚଳରେ ଆଉ ଏକ ନୂଆ ହସ୍ତୀ ସଂରକ୍ଷିତ ଅଭୟାରଣ୍ୟ କରିବା ନେଇ ଚିନ୍ତା କରୁଥିବା ସୂଚନା ମିଳିଛି ।
ଆଜି ଭୁବନେଶ୍ବର ଜୟଦେବ ଭବନ ଠାରେ ଏକ ବେସରକାରୀ ଅନୁଷ୍ଠାନ ପକ୍ଷରୁ ଆୟୋଜିତ କର୍ମଶାଳାରେ ଯୋଗ ଦେଇ ବିଶେଷଜ୍ଞମାନେ ଏହି ଚିନ୍ତାପ୍ରକଟ କରିଛନ୍ତି । ବାରମ୍ବାର ହାତୀ ଜନବସତି ମୁହାଁ ହେଉଥିବା ଖବର ପ୍ରାୟ ପ୍ରତିଦିନ ସାମ୍ନାକୁ ଆସୁଛି । ଯେଉଁଥିରେ ଉଭୟ ମଣିଷ ଓ ହାତୀ ମୃତାହତ ହେଉଥିବା ବେଳେ ବ୍ୟାପକ ମାତ୍ରାରେ ବାସପଯୋଗୀ ସମ୍ପଦ ମଧ୍ୟ ନଷ୍ଟ ହେଉଛି । ଯାହାକୁ ନେଇ ବନ୍ୟପ୍ରାଣୀ ବିଶେଷଜ୍ଞମାନେ ଚିନ୍ତାବ୍ୟକ୍ତ କରିବା ସହିତ ଏହାର ନିରାକାରଣ ଦିଗରେ ଉଭୟ ସରକାର ଓ ଜନସାଧାରଣ ମିଳିତ ଭାବେ ଆଗେଇ ଆସିବାକୁ ଆହ୍ବାନ ଦେଇଛନ୍ତି ।
ସେହିପରି ହାତୀ ଓ ମଣିଷ ମଧ୍ୟରେ ସଂଘର୍ଷ ରୋକିବା ପାଇଁ ଟେକ୍ନୋଲୋଜିର ସହାରା ନିଆଯିବ ବୋଲି ଜଣାପଡିଛି । ଜଙ୍ଗଲ ବିଭାଗ ପକ୍ଷରୁ ଏନେଇ ଭୁବନେଶ୍ବର ଆଇଆଇଟି ସହିତ ଆଲୋଚନା କରାଯାଇ କିପରି ସେମାନଙ୍କ ଗତିବିଧିକୁ ପୂର୍ବରୁ ଜାଣି ହେବ ସେନେଇ ଯନ୍ତ୍ର ଉଦ୍ଭାବନ କରାଯିବାକୁ କୁହାଯାଇଛି ।
ସେଭ ଏଲିଫ୍ୟାଣ୍ଟ ଫାଉଣ୍ଡେସନ ପକ୍ଷରୁ ଆୟୋଜିତ ହେଉଥିବା ଏହି କାର୍ଯ୍ୟକ୍ରମରେ ଜଙ୍ଗଲ ଓ ପରିବେଶ ମନ୍ତ୍ରୀ ଶ୍ରୀଯୁକ୍ତ ବିକ୍ରମ କେଶରୀ ଆରୁଖ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ହାତୀ ସଂରକ୍ଷଣ ପାଇଁ ଉଲ୍ଲେଖନୀୟ ଅବଦାନ ପାଇଁ ବ୍ୟକ୍ତିବିଶେଷଙ୍କୁ ସମ୍ମାନିତ କରାଯାଇଥିବା ବେଳେ ହାତୀ ସୁରକ୍ଷା ଉପରେ ଲିଖିତ ଦୁଇଟି ପୁସ୍ତକ ଉନ୍ମୋଚିତ ହୋଇଥିଲା ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ ।
