ଭୁବନେଶ୍ବର: ଉତ୍କଳ ବିଶ୍ବବିଦ୍ୟାଳୟ (Utkal University)ର ସଂସ୍କୃତ ବିଭାଗରେ ଘଟିଛି ଭୟାବହ ଅଗ୍ନିକାଣ୍ଡ (fire) । ଉତ୍କଳ ବିଶ୍ବବିଦ୍ୟାଳୟର ସଂସ୍କୃତ ବିଭାଗରେ ବିଭାଗୀୟ ମୁଖ୍ୟଙ୍କ କାର୍ଯ୍ୟାଳୟରେ ଘଟିଛି ଅଗ୍ନିକାଣ୍ଡ । କାର୍ଯ୍ୟାଳୟର ଆସବାବ ପତ୍ର ଏବଂ ଫାଇଲ ପତ୍ର ପୋଡ଼ି ଯାଇଛି । ବିଭାଗୀୟ ମୁଖ୍ୟ ଡ. ସୁବାଷ ଚନ୍ଦ୍ର ଦାସଙ୍କ ସୂଚନାନୁଯାୟୀ ଅପରାହ୍ନ ଦୁଇଟା ଚାଳିଶରେ ଅନଲାଇନ କ୍ଲାସ ଚାଲିଥିବାବେଳେ ଏସିରୁ ସର୍ଟସର୍କିଟ ହୋଇଥିଲା ।
ଏବଂ ପରେ ସେଥିରୁ ନିଆଁ ବ୍ୟାପି ଆସବାବପତ୍ର, କମ୍ପୁଟର, ଲ୍ୟାପଟପ ଆଦି ଜିନିଷରେ ନିଆଁ ଲାଗି ଯାଇଥିଲା । ବିଭିନ୍ନ ବିଭାଗୀୟ ଫାଇଲ ପୋଡ଼ି ଯାଇଛି କିନ୍ତୁ ଅତ୍ୟନ୍ତ ଗୁରୁତ୍ବପୂର୍ଣ୍ଣ ଫାଇଲ ଗୁଡିକ ସୁରକ୍ଷିତ ରହିଛି ବୋଲି ସୂଚନା ଦେଇଛନ୍ତି ବିଭାଗୀୟ ମୁଖ୍ୟ ।
ବିଶ୍ବବିଦ୍ୟାଳୟର ସଂସ୍କୃତ ବିଭାଗ (Utkal University Sanskrit department)କୁ ଲାଗି ରହିଥିବା ଅନ୍ୟ ବିଭାଗ ଗୁଡିକ ସୁରକ୍ଷିତ ରହିଥିବା ନେଇ ସୂଚନା ମିଳିଛି । ଅନ୍ୟପଟେ କୋଡିଏ ମିନିଟ ସମୟ ମଧ୍ୟରେ ଅଗ୍ନିଶମ ବାହିନୀର ଗୋଟେ ଦମକଳ ଗାଡି ଆସି ନିଆଁକୁ ଆୟତ୍ତ କରିଛି ।
ଭୁବନେଶ୍ବରରୁ ବିକାଶ କୁମାର ଦାସ ଓ ଦେବସ୍ମିତା ରାଉତ, ଇଟିଭି ଭାରତ
