ଭୁବନେଶ୍ବର: ରାଜ୍ୟ ପାଇଁ ଆଉ ଏକ ଖୁସିର ଖବର । ରାଜ୍ୟରେ କୋରୋନାରୁ ସୁସ୍ଥ ତାଲିକାରେ ଗୁରୁବାର ଯୋଡି ହେଲେ ଆହୁରୀ 72 ଆକ୍ରାନ୍ତ । ଏଥିସହ ରାଜ୍ୟରେ ମୋଟ ସୁସ୍ଥ ସଂଖ୍ୟା 2354ରେ ପହଞ୍ଚିଛି । ଅନ୍ୟ ଶବ୍ଦରେ କହିବାକୁ ଗଲେ ଏହି ସଂଖ୍ୟା ସ୍ପଷ୍ଟ କରେ କି କୋରୋନା ମୁକାବିଲାରେ ରାଜ୍ୟ ଦୃଢତାର ସହ ଆଗେଇ ଚାଲିଛି । ଦିନକୁ ଦିନ ବଢି ଚାଲିଥିବା ଆକ୍ରାନ୍ତ ସଂଖ୍ୟାରେ ଡରି ନଯାଇ ନିଷ୍ଠାପର ସେବା ଓ ଚିକିତ୍ସା ଉଦ୍ୟମରେ ସୁସ୍ଥ ହେବାରେ ଲାଗିଛନ୍ତି ଅର୍ଦ୍ଧାଧିକ ଆକ୍ରାନ୍ତ ।
ସୂଚନା ମୁତାବକ ରାଜ୍ୟରେ କୋରୋନା ମହାମାରୀ ନିଜର କାୟା ବିସ୍ତାର କରି ଚାଲିଥିବା ବେଳେ ଆକ୍ରାନ୍ତଙ୍କ ତୁଳନାରେ ସୁସ୍ଥଙ୍କ ସଂଖ୍ୟା ବୃଦ୍ଧି ପାଉଛି । ତେବେ ଗୁରୁବାର ସୁସ୍ଥ ହୋଇଥିବା 72 ଆକ୍ରାନ୍ତଙ୍କ ମଧ୍ୟରେ ଗଞ୍ଜାମରେ 17, ସୋନପୁରରେ 9, ବଲାଙ୍ଗୀରର 7, ଜଗତସିଂହପୁରରେ 6ଙ୍କ ସମେତ କଟକ, କଳାହାଣ୍ଡି ଓ ସୁନ୍ଦରଗଡରେ 5 ଜଣ ଲେଖାଏଁ ସୁସ୍ଥ ହୋଇଛନ୍ତି । ଏଥିସହ ବାଲେଶ୍ବର ଓ ମୟୂରଭଞ୍ଜରେ 4 ଜଣ, ଖୋର୍ଦ୍ଧା, କନ୍ଧମାଳ ଓ ସମ୍ବଲପୁରରେ 3 ଜଣ ଲେଖାଏଁ ସୁସ୍ଥ ହେବା ସହ ଝାରସୁଗୁଡାରେ ଜଣେ ସୁସ୍ଥ ହୋଇଛନ୍ତି ।
ରାଜ୍ୟରେ ଥିବା ସମସ୍ତ କୋଭିଡ ଡାକ୍ତରଖାନା, ଡାକ୍ତର, ନର୍ସ, ଫାର୍ମାସିଷ୍ଟ, ଏଏନଏମ, ଆଶାକର୍ମୀ, ଅଙ୍ଗନବାଡି କର୍ମୀ, ଶିକ୍ଷକ, ସରପଞ୍ଚ, ପୋଲିସ ଏବଂ ପ୍ରଶାସନିକ କର୍ମଚାରୀଙ୍କ ପାଇଁ ଏହା ସମ୍ଭବ ହୋଇପାରିଛି । ଯେଉଁଥିପାଇଁ ଦ୍ରୁତଗତିରେ ସୁସ୍ଥତା ଆଡକୁ ଆଗଉଛନ୍ତି । ତେବେ ରାଜ୍ୟରେ ମୋଟ 3386 ଆକ୍ରାନ୍ତ ରହିଥିବା ବେଳେ 2354 ଜଣ ସୁସ୍ଥ ହୋଇ ସାରିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
