ଭୁବନେଶ୍ବର: ଆସନ୍ତାକାଲି(ଗୁରୁବାର) ଠୁ ରାଜଧାନୀ ଭୁବନେଶ୍ବରରେ ମ୍ୟାସିଭ ଟୀକାକରଣ ଆରମ୍ଭ ହେବାକୁ ଯାଉଛି । ତିନୋଟି ଜୋନରେ ଜେଡିସିମାନେ ତାଲିକା ପ୍ରସ୍ତୁତ କରି ବିଏମସିକୁ ଦେଇଛନ୍ତି । ୬ଟି ବିଭାଗରେ କାର୍ଯ୍ୟରତ ଲୋକଙ୍କୁ ଏଥର ଗୁରୁତ୍ୱ ଦିଆଯାଇଛି । ଏହାସହ ଟୀକାକରଣ ପାଇଁ ପାଖାପାଖି ୨୦ ହଜାରରୁ ଅଧିକ ଲୋକଙ୍କ ଲିଷ୍ଟ ପ୍ରସ୍ତୁତ ହୋଇଥିବା ସୂଚନା ଦେଇଛନ୍ତି ବିଏମସି କମିଶନର ।
ଏଣିକି ସମସ୍ତ ସରକାରୀ ହସ୍ପିଟାଲରେ ଦିନକୁ ୨୦୦ ଲୋକଙ୍କୁ ଟୀକାକରଣ ପାଇଁ ଟାର୍ଗେଟ ଦିଆଯାଇଛି । ଏବେ ବିଏମସି ପକ୍ଷରୁ ପ୍ରତି ହସ୍ପିଟାଲରେ ୨ଟି ଭ୍ୟାକ୍ସିନେଟର ଟିମ୍ ଗଠନ ହୋଇଛି । ପୂର୍ବରୁ ଗୋଟିଏ ଟିମ ୧୦୦ ଲୋକଙ୍କ ଟୀକାକରଣ କରୁଥିଲେ । ସେହିପରି ପ୍ରାଇଭେଟ୍ ହସ୍ପିଟାଲମାନଙ୍କରେ ମୋବିଲାଇଜେସନ୍ ୩୦ ପ୍ରତିଶତରୁ ୫୦ ପ୍ରତିଶତକୁ ବଢାଇ ଦିଆଯାଇଛି । ରାଜ୍ୟ ସରକାର ବିଏମସିକୁ ଦୈନିକ ୬ ହଜାର ଟାର୍ଗେଟ ଦେଇଛନ୍ତି । ଏନେଇ ଗୁରୁବାର ଠାରୁ ଭୁବନେଶ୍ୱରର ୨୪ଟି ସରକାରୀ ହସ୍ପିଟାଲ ଏବଂ ୩୧ ପ୍ରାଇଭେଟ୍ ହସ୍ପିଟାଲରେ ଟୀକାକରଣ କରାଯିବ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
