ଭୁବନେଶ୍ବର: ରାତି ପାହିଲେ ଆରମ୍ଭ ହେବ ଚତୁର୍ଥ ପର୍ଯ୍ୟାୟ ନିର୍ବାଚନ । ଆଉ ଏଥିପାଇଁ ସରିଛି ସମସ୍ତ ପ୍ରସ୍ତୁତି । 4ର୍ଥ ପର୍ଯ୍ୟାୟ ନିର୍ବାଚନ ନେଇ ସିଇଓ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି । ସୋମବାର 6ଟି ଲୋକସଭା ଓ ଏହା ଅନ୍ତର୍ଗତ 41ଟି ବିଧାନସଭା ଆସନରେ ପଡିବ ଭୋଟ । ଲୋକସଭା ପାଇଁ 12 ମହିଳାଙ୍କ ସମେତ ମୋଟ 52 ଜଣ ପ୍ରାର୍ଥୀ ନିଜର ଅଗ୍ନୀ ପରୀକ୍ଷା ଦେବେ । ବିଧାନସଭା ପାଇଁ 336 ଜଣ ପ୍ରାର୍ଥୀ ଥିବାବେଳେ ସେମାନଙ୍କ ମଧ୍ୟରୁ 34 ମହିଳା ଓ ଜଣେ ତୃତୀୟ ଲିଙ୍ଗୀ ପ୍ରାର୍ଥୀ ଅଛନ୍ତି ।
ସେହିପରି 4ର୍ଥ ପର୍ଯ୍ୟାୟ ମତଦାନ କରିବେ 95 ଲକ୍ଷ 653 ଜଣ ଭୋଟର । ସେମାନଙ୍କ ମଧ୍ୟରୁ ପୁରୁଷ ଭୋଟର ସଂଖ୍ୟା 49ଲକ୍ଷ 10ହଜାର 79 ଏବଂ ମହିଳା ଭୋଟର ସଂଖ୍ୟା 45 ଲକ୍ଷ 98ହଜାର 979 । ସେହିପରି ଦିବ୍ୟାଙ୍ଗ ଭୋଟର ସଂଖ୍ୟା 1 ଲକ୍ଷ 86 ହଜାର 455 । 10 ହଜାର 792 ମତଦାନ କେନ୍ଦ୍ରରେ ଭୋଟିଂ ହେବ ।
ରାଜ୍ୟର ଶେଷ ପର୍ଯ୍ୟାୟ ନିର୍ବାଚନରେ କେନ୍ଦ୍ରାପଡା ଉପରେ ବିଶେଷ ଧ୍ୟାନ ରଖାଯାଇଛି । ତେଣୁ ଏନେଇ କେନ୍ଦ୍ରାପଡାରେ ଅଧିକ ଫୋର୍ସ ମୁତୟନ କାରାଯାଇଛି । ଏହା ସହିତ ପୋଲିଂ ବୁଥରେ କ୍ୟାମେରା ପ୍ରବେଶ ବେଆଇନ ବୋଲି ପ୍ରେସମିଟରେ ସିଇଓ କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
