ଭୁବନେଶ୍ବର: କାନନ ବିହାର ଲୁଟ ପଛରେ ବାଂଲାଦେଶୀ ଲିଙ୍କ । ରାଜଧାନୀରେ ଆତଙ୍କ ଖେଳାଉଛନ୍ତି ବାଂଲାଦେଶୀ ଲୁଟେରା । କବାଟ ଓ ଝରକା ତାଡି ଘରେ ପଶିବା ସହ ଗୋଡ ହାତ ବାନ୍ଧି ଲୁଟ କରୁଛନ୍ତି ସୁନା ଗହଣା । ଏପରିକି ଛୋଟ ପିଲାଙ୍କ ବେକରେ ଛୁରି ଲଗାଇ ଲୋକଙ୍କୁ ଭୟଭୀତ କର ଲୁଟପାଟ କରୁଛନ୍ତି ଏମାନେ । ଏପରି ଆତଙ୍କ ରାଜ କରୁଥିବା ବାଂଲାଦେଶୀ ଗ୍ଯାଙ୍ଗର ସୁରାଖ ଲାଗିଛି କମିସନରେଟ ପୋଲିସ ହାତରେ । ଯାହାକୁ ନେଇ ଦିଲ୍ଲୀ ଗସ୍ତ କରିଛି କମିସନରେଟ ପୋଲିସର ଏକ ଟିମ । କାରଣ ଏହି ଗ୍ଯାଙ୍ଗର ଦୁଇ ଲୁଟେରା ଏବେ ଦିଲ୍ଲୀ ପୋଲିସ କବଜାରେ ।
ଗୋଆ, ବାଙ୍ଗାଲୋର, ଚେନ୍ନାଇ ଭଳି ଅନେକ ସହରରେ ଏଇଭଳି ଲୁଟପାଟ କରି ଫେରାର ହେଉଥିବା ଗ୍ଯାଙ୍ଗର ସୁରାଖ ପାଇ ଦୁଇ ଜଣଙ୍କୁ ଗିରଫ କରିଥିଲା ଦିଲ୍ଲୀ ପୋଲିସର ସ୍ପେଶାଲ ସ୍କ୍ବାଡ । ପଚରା ଉଚରା ବେଳେ ଭୁବନେଶ୍ବରରେ ବି ଲୁଟପାଟ କରିଥିବା ମାନିଛନ୍ତି ଲୁଟେରା । ତେବେ ପଶ୍ଚିମବଙ୍ଗ ଦେଇ ଭାରତକୁ ପ୍ରବେଶ କରୁଥିବା ଲୁଟେରାଙ୍କ ପାଇଁ ସୁରକ୍ଷିତ ରୁଟ ହେଉଛି ଟ୍ରେନ ଯାତ୍ରା । ନିର୍ଦ୍ଧିଷ୍ଟ ଅଞ୍ଚଳରୁ ଲୁଟପାଟ ପରେ ନିକଟସ୍ଥ ଷ୍ଟେସନ ଦେଇ ସେମାନେ ଟ୍ରେନରେ ମାରୁଥିଲେ ଚମ୍ପଟ । ତେବେ ଦୁଇ ଲୁଟେରାଙ୍କୁ ଟ୍ରାନଜିଟ ରିମାଣ୍ଡରେ ଆଣି ପଚରାଉଚରା କରିବ କମିସନରେଟ ପୋଲିସ ।
ପୋଲିସ ସ୍କାନରରେ ରହିଛି ଦୁଇଟି କେସ । ସମାନ ଢଙ୍ଗରେ ଓ ସମାନ ଅଞ୍ଚଳରୁ ଲୁଟ ପରେ ଫେରାର ହୋଇଥିଲେ ଲୁଟେରା । ଫେବୃଆରୀ ୨ ତାରିଖ ଇନଫୋସିଟି ଥାନା କାନନ ବିହାରର ସେନାଅଧିକାରୀଙ୍କ ଘରୁ ଲୁଟ ଓ ଚନ୍ଦ୍ରଶେଖରପୁର ଥାନା ଶୈଳଶ୍ରୀ ବିହାରର ଜଣେ ମହିଳାଙ୍କ ଘରୁ ମଧ୍ଯ ସମାନ ଢଙ୍ଗରେ ଲୁଟ ହୋଇଥିଲା । ତେବେ ଚୋରି ହୋଇଥିବା ଏକ ମୋବାଇଲର ଲୋକେସନ ବାଂଲାଦେଶ ସୀମାରେ ଟ୍ରାକ ହେବା ପରେ ହୋଇଥିଲା ଲୁଟେରାଙ୍କ ପର୍ଦ୍ଦାଫାସ । ଦୁଇ ଲୁଟେରାଙ୍କୁ ରିମାଣ୍ଡରେ ଆଣିବା ପରେ ଜଣାପଡିବ ଗ୍ଯାଙ୍ଗରେ ବାକି ସଦସ୍ଯ ଓ ସେମାନଙ୍କ ଲୁଟ ସମ୍ପର୍କରେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
