ଭୁବନେଶ୍ବର: ଓଡିଶା ଡ୍ୟାନ୍ସ ଏକାଡେମୀ, ଆର୍ଟ ଭିଜନ ଓ ରାଜ୍ୟ ପର୍ଯ୍ୟଟନ ବିଭାଗର ମିଳିତ ସହଯୋଗରେ ଆୟୋଜିତ ହେଉଥିବ 16ଷ ଧଉଳି କଳିଙ୍ଗ ମହୋତ୍ସବ ସୋମବାର ଉଦ୍ଘାଟିତ ହୋଇଯାଇଛି । କଳିଙ୍ଗର ସେହି ମାଟି ଯେଉଁଠି ଚଣ୍ଡାଶୋକ ଧର୍ମାଶୋକରେ ପରିଣତ ହୋଇ ଶାନ୍ତିର ବାର୍ତ୍ତା ବାଣ୍ଟି ଥିଲେ ସେହିଠାରୁ ଆଜି ଗୁଞ୍ଜରିତ ହେଉଛି ନୃତ୍ୟଶିଳ୍ପୀଙ୍କ ଘୁଙ୍ଗୁର ଓ ବାଦ୍ୟଯନ୍ତ୍ରର ଅପୂର୍ବ ଶବ୍ଦରେ ।
ଏହି ଉତ୍ସବର ପ୍ରଥମ ଅର୍ଘ୍ୟ ରୂପେ ଓଡିଶା ଡ୍ୟାନ୍ସ ଏକାଡେମୀ ଓ ସୃଜନ ଅନୁଷ୍ଠାନର କଳାକାରମାନେ ମିଳିତ ଭାବେ ପରିବେଷଣ କରିଥିଲେ ଓଡ଼ିଶୀର ପଲ୍ଲବୀ । ଯାହାକି ରାଗ ଶଙ୍କର ଭରଣ ଓ ହଂସ ଧ୍ଵନି ଏବଂ ତାଳ ଏକତାଳି ଉପରେ ନିବଦ୍ଧ ଥିଲା । ଯାହାକି ଓଡିଶୀ ଗୁରୁ କେଳୁ ଚରଣ ମହାପତ୍ରଙ୍କ ଉଦେଶ୍ୟରେ ଶ୍ରଦ୍ଧାଞ୍ଜଳି ସ୍ୱରୂପ ପରିବେଷଣ କରାଯାଇଥିବା କହିଛନ୍ତି ଅନୁଷ୍ଠାନର ମୁଖ୍ୟ ଶ୍ରୀମତୀ ଅରୁଣା ମହାନ୍ତି । ଏହା ପରେ ପରେ ବମ୍ବେରୁ ଆସିଥିବା କଥକ ନୃତ୍ୟାଙ୍ଗନା ରାଜଶ୍ରୀ ସିର୍କେଭ ତାଙ୍କ ସାଥୀମାନେ କଥକ ଓ ଆସ୍ଥା ଡେବୁ ଓ ତାଙ୍କ ସାଥୀମାନେ ସମକାଳୀନ ନୃତ୍ୟ ପରିବେଷଣ କରିଥିଲେ । ଯାହାକି ଉପସ୍ଥିତ ଦର୍ଶକମାନଙ୍କୁ ଭରପୁର ମନୋରଞ୍ଜନର ଖୋରାକ ଯୋଗାଇ ଥିବା ଦେଖିବାକୁ ମିଳିଥିଲା ।
ତେବେ ଏହି ଉତ୍ସବ 16 ବର୍ଷରେ ପଦାର୍ପଣ କରିଥିବାବେଳେ ଏଠାରେ ଏକ ଆମ୍ପି ଥିଏଟର ପ୍ରତିଷ୍ଠା କରିବା ସହ ଏହାକୁ ବିଶ୍ୱସ୍ତରୀୟ ଏକ ଉତ୍ସବଭାବେ ପରିଚିତ କରାଯିବା ପାଇଁ ଅନୁଷ୍ଠାନ ପ୍ରଚେଷ୍ଟା କରୁଥିବା କହିଛନ୍ତି ଶ୍ରୀମତୀ ମହାନ୍ତି । ସନ୍ଧ୍ୟାର ଆରମ୍ଭ ଅତିଥିମାନଙ୍କ ଦ୍ୱାରା ପ୍ରଦୀପ ପ୍ରଜ୍ଜ୍ୱଳନ ଦ୍ୱାରା ହୋଇଥିଲା । ଏଥିରେ ବିଶିଷ୍ଟ ନୃତ୍ୟାଙ୍ଗନା ତଥା ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ଶ୍ରୀମତୀ ପ୍ରିୟମ୍ବଦା ମହାନ୍ତି ହେଜମାଦୀ, ବିଶିଷ୍ଟ ଭାଷାବିତ ଡ଼ଃ ଦେବୀପ୍ରସନ୍ନ ପଟ୍ଟନାୟକ, ମୁଖ୍ୟମନ୍ତ୍ରୀଙ୍କ ଉପଦେଷ୍ଟା ଆର ବାଲକୃଷ୍ଣନ ପ୍ରମୁଖ ଯୋଗ ଦେଇଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
