ଭଦ୍ରକ: ବାସୁଦେବପୁର ଜଳ ସେଚନ ବିଭାଗରେ ଦୀର୍ଘ 5 ବର୍ଷ ଧରି କାର୍ଯ୍ୟ କରି ଆସୁଥିଲେ ମଧ୍ୟ ଆଜି ପର୍ଯ୍ୟନ୍ତ ଦରମା ପାଇବାରୁ ବଞ୍ଚିତ ହୋଇ ଆସିଥିଲେ । ବାଧ୍ୟ ହୋଇ ଦେହରେ କିରାସିନି ଢାଳି ଆତ୍ମାହୁତି ଉଦ୍ୟମ କରିଛନ୍ତି ଜଳସେଚନ ବିଭାଗର କର୍ମଚାରୀ ଦିବାକର ଦାସ । ସୂଚନାନୁଯାୟୀ ଦିବାକର ବିଗତ 1983 ମସିହାରେ ଚାକିରୀରେ ଯୋଗ ଦେଇଥିବାବେଳେ 1989 ମସିହାରେ ତାଙ୍କୁ ଚାକିରୀରୁ ଛଟେଇ କରିଦିଆଯାଇଥିଲା ।
ହେଲେ ନ୍ୟାୟାଳୟଙ୍କ ନିର୍ଦ୍ଦେଶ କ୍ରମେ 2016 ମସିହାରେ ତାଙ୍କୁ ପୁଣି ଚାକିରୀରେ ନିଯୁକ୍ତି ଦିଆଯାଇଥିଲା । ହେଲେ ପୁଣି ଦରମା ନ ପାଇବାରୁ ଦିବାକର 2018 ମସିହାରେ କାର୍ଯ୍ୟାଳୟ ଆଗରେ ଆମରଣ ଅନଶନରେ ବସିବାରୁ ଉଚ୍ଚ ପଦସ୍ତ ଅଫିସରେ ଦରମା ଦେବାକୁ କହି ଅନଶନରୁ ଉଠାଇ ଦେଇଥିଲେ ।
ତେବେ ଆଜି ପର୍ଯ୍ୟନ୍ତ ଦିବାକର କାର୍ଯ୍ୟାଳୟରେ ନିଜର କାର୍ଯ୍ୟ ତୁଲାଇ ଆସୁଥିଲେ ମଧ୍ୟ ଦରମା ନମିଳିବାରୁ ବାଧ୍ୟ ହୋଇ କାର୍ଯ୍ୟାଳୟ ଆଗରେ ଦେହରେ କିରାସିନି ଢାଳି ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ ।
ଏନେଇ ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଦିବାକରଙ୍କୁ କିରାସିନି ଜୁଡୁବୁଡୁ ଅବସ୍ଥାରେ ଉଦ୍ଧାର କରି ଥାନାକୁ ନେଇ ଆସିଥିଲେ । ତେବେ ପୋଲିସ କି ବିଭାଗୀୟ ଅଧିକାରୀ ଏନେଇ କୌଣସି ପ୍ରତିକ୍ରିୟା ପ୍ରକାଶ କରି ନାହାଁନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
