ବ୍ରହ୍ମପୁର: ଲକଡାଉନ ଯୋଗୁଁ ବିଭିନ୍ନ ରାଜ୍ୟରେ ଫସିଥିବା ଦାଦନ ଶ୍ରମିକଙ୍କୁ ସରକାର ବସ ଓ ଟ୍ରେନରେ ଫେରାଇ ଆଣିବାକୁ ପ୍ରକ୍ରିୟା ଜାରି ରଖିଛନ୍ତି । ମାତ୍ର ସେଠାରୁ ଫେରିବା ପରେ ପ୍ରବାସୀ ଦାଦନ ଶ୍ରମିକ ମାନେ ବିଭିନ୍ନ କ୍ବାରେଣ୍ଟାଇନ ସେଣ୍ଟରରେ ପ୍ରବାସୀ ଶ୍ରମିକଙ୍କ ବିଶୃଙ୍ଖଳିତ ଆଚରଣ ଦେଖିବାକୁ ମିଳୁଛି । ଯାହା ଏବେ ଗଞ୍ଜାମ ସରକାରଙ୍କ ସହ ପୂରା ଜିଲ୍ଲାବାସୀଙ୍କ ଚିନ୍ତା ବଢାଇ ଦେଇଛି ।
ଦାଦନ ଫେରନ୍ତାଙ୍କ ଏଭଳି କାର୍ଯ୍ୟକଳାପ ଦେଖି ଜିଲ୍ଲାର ବିଭିନ୍ନ ସ୍ଥାନରେ ହୋଇଥିବା କ୍ବାରେଣ୍ଟାଇନ ସେଣ୍ଟରରେ ପ୍ରଶାସନିକ ଅଧିକାରୀ ନଜର ରଖିଥିବା ବେଳେ ସେମାନଙ୍କ ବ୍ୟବହାରରେ ଶାଳିନତା ନରଖିଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଛନ୍ତି ଗଞ୍ଜାମ ଜିଲ୍ଲା ଆରକ୍ଷୀ ଅଧିକ୍ଷକ । ଅନ୍ୟପଟେ କିଛି ଦାୟିତ୍ୱବାନ ସୁରଟ ଫେରନ୍ତା ଏ ନେଇ କ୍ଷମା ମଧ୍ୟ ମାଗିଛନ୍ତି।
ସେପଟେ ଗଞ୍ଜାମ ଜିଲ୍ଲାରେ କେତେକ ସେଣ୍ଟରରେ ରହୁଥିବା ଦାଦନମାନେ ସାମାଜିକ ଦୂରତ୍ବ ରକ୍ଷା କରି ବିଭିନ୍ନ ଧାର୍ମିକ ଗତିବିଧିରେ ନିଜକୁ ନିୟୋଜିତ କରୁଥିବା ,ତ କେଉଁଠି ଯୋଗ କରୁଥିବାର ଭିଡ଼ିଓ ମଧ୍ୟ ଭାଇରାଲ ହେଇଥିଲା । ତେବେ ଏତେ ସଂଖ୍ୟାରେ ଦାଦନଙ୍କୁ ଜିଲ୍ଲାରେ ସୁବିଧାରେ ରଖିବା ଜିଲ୍ଲା ପ୍ରଶାସନ ପାଇଁ ଏକ ବଡ଼ ଚ୍ୟାଲେଞ୍ଜ ଭାବେ ଉପସ୍ଥିତ ହେଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
