ବ୍ରହ୍ମପୁର: ଜାନୁଆରୀ 3ରୁ ତାରାତାରିଣୀଙ୍କୁ ଦର୍ଶନ କରିପାରିବେ ସାଧାରଣ ଲୋକେ । ଏନେଇ ପ୍ରଶାସନ ପକ୍ଷରୁ ଏକ ଏସଓପି ପ୍ରସ୍ତୁତ କରାଯାଇଛି । ମାଆଙ୍କ ଗର୍ଭଗୃହରେ ଯିବାକୁ ବାରଣ କରାଯାଇଥିବାବେଳେ ମନ୍ଦିର ପରିସରରେ ବଣଭୋଜି କି ବିବାହ ଉତ୍ସବ ଆୟୋଜନ ପାଇଁ କଟକଣା ଜାରି କରାଯାଇଛି । ଜିଲ୍ଲା ପ୍ରଶାସନ ପକ୍ଷରୁ ସଦର ମହକୁମା ଛତ୍ରପୁର ଠାରେ ମନ୍ଦିର ଖୋଲାଯିବା ପାଇଁ ଆୟୋଜିତ ହୋଇଥିବା ବୈଠକରେ ବିସ୍ତୃତ ଭାବରେ ଆଲୋଚନା କରାଯାଇଛି । ଜିଲ୍ଲାପାଳ ବିଜୟ ଅମୃତ କୁଲାଙ୍ଗେଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଦର୍ଶନ ସମୟରେ ପ୍ରତ୍ୟେକ ଭକ୍ତ ମାସ୍କ ପରିଧାନ ବାଧ୍ୟତାମୂଳକ କରାଯାଇଥିବା ବେଳେ ମନ୍ଦିରରେ ସାନିଟାଇଜର ବ୍ୟବହାର ଉପରେ ଗୁରୁତ୍ବ ଦିଆଯାଇଛି ।
ମନ୍ଦିର କାର୍ଯ୍ୟ ଜାରି ରହିଥିବାରୁ ଭକ୍ତମାନେ ଆସିଥିବା ଗାଡି ଗୁଡିକ ମନ୍ଦିର ପାଖକୁ ଛଡାଯିବ ନାହିଁ । ଏକ ସ୍ବତନ୍ତ୍ର ବସ ଯୋଗେ ଭକ୍ତମାନେ ମାଙ୍କ ପାଖକୁ ଯାଇ ଦର୍ଶନ କରି ପାରିବେ ବୋଲି କୁହାଯାଇଛି । ଗୋଟିଏ ଥରରେ କେତେ ଭକ୍ତ ମନ୍ଦିର ମଧ୍ୟରେ ପ୍ରବେଶ କରିବେ ସେ ନେଇ ଆଲୋଚନା କରାଯାଇ ନିଷ୍ପତ୍ତି ନିଆଯିବ ବୋଲି କୁହାଯାଇଛି । ଏହି ବୈଠକରେ ଜିଲ୍ଲା ପ୍ରଶାସନ ସମେତ ମନ୍ଦିରର ପରିଚାଳନା କମିଟି ,ସେବାୟତ ,ପୋଲିସ ବିଭାଗର ଅଧିକାରୀମାନେ ଉପସ୍ଥିତ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
