ବ୍ରହ୍ମପୁର: ଜିଲ୍ଲାସ୍ତରୀୟ ନିର୍ଭୟାକଢୀ ଏବଂ ମୋ ଗେଲ୍ଲା ଝିଅ କାର୍ଯ୍ୟକ୍ରମର ସମୀକ୍ଷା କରିଛନ୍ତି ଗଞ୍ଜାମ ଜିଲ୍ଲାପାଳ । ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଜିଲ୍ଲାର ୧ ହଜାର ୩୨ଟି ଗ୍ରାମ ସହ ୧୪୦ଟି ସହରାଞ୍ଚଳର ୱାର୍ଡକୁ ବାଲ୍ୟ ବିବାହ ମୁକ୍ତ ଅଞ୍ଚଳ ଭାବରେ ଘୋଷଣା କରାଯାଇଛି । ତେବେ ଏହି ସଂଖ୍ୟାକୁ ବୃଦ୍ଧି କରି ଆସନ୍ତା ୬ ମାସ ମଧ୍ୟରେ ସମସ୍ତ ଗ୍ରାମାଞ୍ଚଳ ଏବଂ ସହରାଞ୍ଚଳକୁ ବାଲ୍ୟ ବିବାହ ମୁକ୍ତ କରିବା ଦିଗରେ ସମସ୍ତେ ଲକ୍ଷ୍ୟ ରଖିବାକୁ ବୈଠକରେ ଆହ୍ୱାନ ଦିଆଯାଇଛି ।
ଏହି ଅବସରରେ ପ୍ରତ୍ୟେକ ମାସର ୧୪ ତାରିଖକୁ ମୋ ଗେଲ୍ଲା ଝିଅ କାର୍ଯ୍ୟକ୍ରମ ଆୟୋଜନ କରିବାକୁ ବୈଠକରେ ସ୍ଥିର ହୋଇଛି । ଏଥିସହ ଜିଲ୍ଲାରେ ଭୃଣହତ୍ୟା ରୋକିବା ଉପରେ ଅଧିକ ଗୁରୁତ୍ୱ ଦେବା, ଶିଶୁ କନ୍ୟା ଏବଂ ପୁତ୍ର ସନ୍ତାନର ଜନ୍ମହାର ସମତୁଲ ରଖିବା ପାଇଁ ଆହ୍ୱାନ ଦିଆଯାଇଛି । ଏହି ବୈଠକରେ ବ୍ରହ୍ମପୁର ଉପଜିଲ୍ଲପାଳ ଭି.କିର୍ତ୍ତୀ ଭାଶନଙ୍କ ସମେତ ସ୍ୱାସ୍ଥ୍ୟ ବିଭାଗର ଅଧିକାରୀ, ବିଭିନ୍ନ ବିଭାଗର ଅଧିକାରୀ ଏବଂ ସ୍ୱେଚ୍ଛାସେବୀ ଅନୁଷ୍ଠାନର କର୍ମକର୍ତ୍ତାମାନେ ଉପସ୍ଥିତ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
