ବ୍ରହ୍ମପୁର: ଗଞ୍ଜାମ ଜିଲ୍ଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଗ୍ରାମାଞ୍ଚଳରେ ରାଜନୀତି ତାତି ଦେଖିବାକୁ ମିଳିଛି । ଆଜି ଜିଲ୍ଲାର ଦିଗପହଣ୍ଡି ଥାନା ଅଞ୍ଚଳରେ ପ୍ରାକ୍ ନିର୍ବାଚନୀ ହିଂସା ଘଟଣାରେ ପୋଲିସ ୮ ଜଣଙ୍କୁ ଗିରଫ କରିଛି ।
ଏହି ଘଟଣାକୁ ନେଇ ଥାନା ସାମ୍ନାରେ ବିଜେପି ପକ୍ଷରୁ ଧାରଣା ଦିଆଯାଇଛି । ମୁଖ୍ୟତଃ ଦିଗପହଣ୍ଡି ବ୍ଲକ ଅନ୍ତର୍ଗତ ଚୌଧୁରୀ ଟିକରପଡା ଓ ଗୌଡ ଗାଁ ପଞ୍ଚାୟତରେ ବିଜେଡି ଓ ବିଜେପି କର୍ମୀଙ୍କ ମଧ୍ୟରେ ପ୍ରାକ୍ ନିର୍ବାଚନୀ ହିଂସା ଦେଖିବାକୁ ମିଳିଛି । ଏ ନେଇ କେ. ନୂଆଗାଁ ଥାନା ପୋଲିସ ଉଭୟ ଗ୍ରାମରୁ ୩ ବିଜେଡି କର୍ମୀ ଓ ୫ ବିଜେପି କର୍ମୀଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ତେବେ ବିଜେପି କର୍ମୀଙ୍କୁ ବିନା କାରଣରେ ଗିରଫ କରାଯାଇଥିବା ଅଭିଯୋଗ କରି ଥାନା ଫାଟକ ସମ୍ମୁଖରେ ଧାରଣା ଦେଇଥିଲା ବିଜେପି । ତେବେ ଗତକାଲି ପ୍ରାର୍ଥୀପତ୍ର ଦାଖଲ ସମୟର ପ୍ରଥମ ଦିନରେ ହିଁ ସି.ଏଚ୍. ଟିକରପଡା ପଞ୍ଚାୟତ ଓ ଗୌଡ ଗାଁ ପଞ୍ଚାୟତରେ ବିଭିନ୍ନ ପ୍ରାର୍ଥୀଙ୍କୁ ପ୍ରତିଦ୍ବନ୍ଦିତାରୁ ଦୂରେଇ ରହିବାକୁ ଧମକ ଚମକ ଦେଉଥିବା ନେଇ ଉଭୟ ଦଳ ଭିତରେ ରାଜନୈତିକ ଉଷ୍ମତା ଦେଖା ଦେଇଥିଲା । ଫଳରେ ଉଭୟ ଗ୍ରାମରେ ଆକ୍ରମଣ ପ୍ରତି ଆକ୍ରମଣ ହୋଇଥିଲା । ଏହାପରେ ଉଭୟଙ୍କ ପକ୍ଷରୁ ଏତଲା ଦିଆଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
