ବ୍ରହ୍ମପୁର: ବ୍ରହ୍ମପୁର ସହର ମଧ୍ୟରେ ରହିଥିବା ପୋଖରୀ ଗୁଡ଼ିକର ରକ୍ଷଣାବେକ୍ଷଣ ପାଇଁ ରାଷ୍ଟ୍ରୀୟ ମଜଦୂର କଂଗ୍ରେସ ପକ୍ଷରୁ ଦାବି ଉଠିଛି । ଏହାକୁ ନେଇ ଗଞ୍ଜାମ ଜିଲ୍ଲା ରାଷ୍ଟ୍ରୀୟ ମଜଦୂର କଂଗ୍ରେସ ପକ୍ଷରୁ ଭିଜିଲାନ୍ସ ଆରକ୍ଷୀ ଅଧିକ୍ଷକଙ୍କୁ ଏକ ଏଫଆଇଆର ପ୍ରଦାନ କରାଯାଇଛି । ସହର ମଧ୍ୟରେ ରହିଥିବା ପୋଖରୀ ଗୁଡ଼ିକର ରକ୍ଷଣାବେକ୍ଷଣ ଅର୍ଥ ଆସୁଥିଲେ ସୁଦ୍ଧା ଏହାର ସଠିକ ବ୍ୟବହାର କରାଯାଉନଥିବା ଅଭିଯୋଗ ହୋଇଛି ।
ରେଶମ ସହର ମଧ୍ୟରେ ଥିବା ପୋଖରୀ ଗୁଡ଼ିକ ପାଇଁ ୨୦୦୭ ରୁ ୨୦୨୧ ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ଅନୁଦାନ ଦିଆଯାଇଛି । ମୋଟ ୧୪ କୋଟି ୯୯ ଲକ୍ଷ ୩୦ ହଜାର ଟଙ୍କା ମହାନଗର ନିଗମକୁ ଦିଆଯାଇଥିବା ସୂଚନା ଅଧିକାର ଆଇନରୁ ଜଣା ପଡ଼ିଛି । ଏହି ଅନୁଦାନର ସଠିକ ବିନିଯୋଗ ହୋଇନଥିବା ଗଞ୍ଜାମ ଜିଲ୍ଲା ରାଷ୍ଟ୍ରୀୟ ମଜଦୂର କଂଗ୍ରେସ ଅଭିଯୋଗ କରିଛି ।
ଗୋଷାଣୀନୁଆଗାଁ ଉତ୍ତରେଶ୍ବର ପୋଖରୀ, ବିଜିପୁର ପୋଖରୀ ଓ ପାୟଲ ସିନେମା ହଲ ପାଖରେ ରହିଥିବା ପୋଖରୀରେ ଏକାଧିକ ଥର କୋଟିକୋଟି ଟଙ୍କା ଖର୍ଚ୍ଚ ହୋଇଛି । ହେଲେ ସହରର ଅନ୍ୟ ପୋଖରୀ ଗୁଡ଼ିକୁ କାହିଁକି ଅଣଦେଖା କରାଗଲା ବୋଲି ପ୍ରଶ୍ନ କରିଛି ରାଷ୍ଟ୍ରୀୟ ମଜଦୂର କଂଗ୍ରେସ । ସହରରେ ଥିବା 40 ଗୋଟି ଜଳାଶ୍ରୟ ଗୁଡ଼ିକରୁ ଠିକ ଭାବରେ ପଙ୍କ ବାହାର ନହେବା, ଦଳ ସଫା ନହେବ, ପଥର ବନ୍ଧ ଓ ତାର ଜାଳି ବନ୍ଧରେ ନିମ୍ନ ମାନର କାର୍ଯ୍ୟ ହୋଇଥିବା ଅଭିଯୋଗ ହୋଇଛି ।
ସାଧାରଣ ଲୋକଙ୍କ ଏହି ଟଙ୍କାକୁ କିଛି ଅସାଧୁ ଅଧିକାରୀ, ଠୀକାଦାର ଓ ରାଜନେତା ଚଳୁ କରି ଦେଇ ଥିବା ଅଭିଯୋଗ କରି ଏହାର ଭିଜିଲାନ୍ସ ତଦନ୍ତ କରିବାକୁ ଦାବି କରାଯାଇଛି । ଆଇନଜୀବି ପୀତବାସ ପଣ୍ଡାଙ୍କ ନେତୃତ୍ବରେ ଏକ ପ୍ରତିନିଧି ମଣ୍ଡଳ ଭିଜିଲାନ୍ସ ଆରକ୍ଷୀ ଅଧିକ୍ଷକଙ୍କୁ ଏହାକୁ ନେଇ ଅଭିଯୋଗ କରିଛି । ଏହି କାର୍ଯ୍ୟକ୍ରମରେ ମଜଦୂର କଂଗ୍ରେସ ଜିଲ୍ଲା ସଭାପତିଙ୍କ ସମେତ ଭୋକାଲି ସେଠୀ, ଉଦୟ ପାଣିଗ୍ରାହୀ, ରଞ୍ଜନ ତରାଇ, ସୁଧୀର ମହାରଣା, ସାଇ ରାମ ପାତ୍ର,ପଦ୍ମ ଚରଣ ସାହୁ, ଆରତୀ ପଟ୍ଟନାୟକ, ଙ୍କ ସମେତ ବହୁ ନେତୃବୃନ୍ଦ ପ୍ରମୁଖ ଉପସ୍ଥିତ ରହିଥିଲେ l
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
