ବ୍ରହ୍ମପୁର: ପୋଲିସ କବଜାରେ ମୋଟର ସାଇକେଲ ଚୋର । ବ୍ରହ୍ମପୁର ସହରରେ ବିଭିନ୍ନ ସ୍ଥାନରୁ ବାଇକ ଚୋରି କରି ଲୋକଙ୍କ ଚିନ୍ତା ବଢାଇଥିବା ବାଇକ ଚୋରକୁ କାବୁ କରିଛି ବ୍ରହ୍ମପୁର ଟାଉନ ପୋଲିସ ।
ବ୍ରହ୍ମପୁର ଏମକେସିଜି ମେଡିକାଲ କ୍ୟାମ୍ପସ ପରିସରରୁ ଗତ ଜାନୁୟାରୀ ୩୧ ତାରିଖରେ ଗୋଟିଏ ହୋଣ୍ଡା ସାଇନ ମୋଟର ସାଇକେଲ ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା । ପୋଲିସ ଅଭିଯୋଗ ଆଧାରରେ ତଦନ୍ତ ଆରମ୍ଭ କରିଥିଲା । ସହରର ଗୋଷାଣିନୂଆଗାଁ, ଟାଉନ ଓ ବୈଦ୍ୟନାଥପୁର ଥାନା ପୋଲିସ ପକ୍ଷରୁ ମିଳିତ ଭାବରେ ଏହି ଚଢ଼ାଉ କରାଯାଇଥିଲା । ଚଢାଉରେ ମୋଟର ସାଇକେଲ ଚୋର ଏଲ ଶିବା ରେଡିକୁ ଗିରଫ କରିଛି । ଶିବା ରେଡିର ଘର ଦିଗପହଣ୍ଡି ଥାନା ଅନ୍ତର୍ଗତ ଗୋକର୍ଣ୍ଣପୁର ଗ୍ରାମରେ ବୋଲି ଜଣାପଡିଛି ।
ପୋଲିସ ପକ୍ଷରୁ ଜେରା ସମୟରେ ଶିବା ଓ ତାର ଗ୍ୟାଙ୍ଗ ବିଭିନ୍ନ ସ୍ଥାନରୁ ନଅଟି ବାଇକ ଚୋରି କରିଥିବା ନେଇ ସ୍ବୀକାର କରିଥିଲା । ପୋଲିସ ସେମାନଙ୍କ ନିକଟରୁ ନଅଟି ବାଇକ ଜବତ କରିଛି । ଜବତ ମୋଟର ସାଇକେଲର ପ୍ରକୃତ ମାଲିକଙ୍କ ସନ୍ଧାନ କରାଯାଉଥିବା କହିଛନ୍ତି ବ୍ରହ୍ମପୁର ଅତିରିକ୍ତ ଏସପି ପ୍ରଭାତ କୁମାର ରାଉତରାୟ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
