ବ୍ରହ୍ମପୁର: ଦକ୍ଷିଣ ଓଡିଶାର ସର୍ବପୁରାତନ ସହର ବ୍ରହ୍ମପୁର । କଳା, ସଂସ୍କୃତି, ଐତିହ୍ୟ ପାଇଁ ଦେଶ ବିଦେଶରେ ଖୁବ ପରିଚିତ । ରେଶମ ସହରରେ ଅନେକ ପୁରାତନ ମନ୍ଦିର ରହିଥିବା ବେଳେ ଏଠାରେ ଏପରି ଏକ ମନ୍ଦିର ରହିଛି ଯେଉଁଠି ଭଗବାନଙ୍କ ରୂପରେ ପୂଜା ପାଉଛନ୍ତି ଅହିଂସାର ପୂଜାରି ମହାତ୍ମା ଗାନ୍ଧୀ । ଘଣ୍ଟଘଣ୍ଟା ବାଜି ବାପୁଜୀଙ୍କ ପୂଜାର୍ଚ୍ଚନା କରାଯାଉଛି । ବ୍ରହ୍ମପୁରର ପ୍ରସିଦ୍ଧ ଉତ୍ତରେଶ୍ୱର ମନ୍ଦିର ପରିସରରେ ପୂଜା ପାଇ ଆସୁଛନ୍ତି ଜାତିର ଜନକ ମହାତ୍ମାଗାନ୍ଧୀ ।
୧୯୬୦ ମସିହାରୁ ଏଠାକାର ଜଗନ୍ନାଥମନ୍ଦିରର ପାର୍ଶ୍ୱ ଦେବତାଙ୍କ ମଧ୍ୟରେ ବାପୁଙ୍କ ପ୍ରତିମୂର୍ତ୍ତୀ ସ୍ଥାପିତ କରାଯାଇ ଦୈନିକ ପୂଜାର୍ଚ୍ଚନା କରାଯାଏ । ମୁଖ୍ୟତଃ ଗୋସାଇଁ ନୂଆଗାଁ ଜଗନ୍ନାଥ ମନ୍ଦିରରେ ପାର୍ଶ୍ୱଦେବତାଙ୍କ ମଧ୍ୟରେ ପଞ୍ଚ ଦେବତା, ବିମଳା, ହନୁମାନ ନବଗ୍ରହ ଏବଂ ଭାଗବତ ଗାଦି ରହିଥିବା ସ୍ଥାନରେ ପ୍ରଭୁ ଶ୍ରୀରାମଙ୍କ ସହ ଗୋଟିଏ ସ୍ଥାନରେ ବାପୁଙ୍କୁ ସମସ୍ତେ ପୂଜା କରିଥାନ୍ତି । ଏଠାରେ ସକାଳ ଆଳତି, ବାଳଭୋଗ ଠାରୁ ଆରମ୍ଭ କରି ମଧ୍ୟାହ୍ନରେ ଅନ୍ନଭୋଗ, ସନ୍ଧ୍ୟା ଆଳତୀ କରାଯାଇ ପହଡ ପକାଯିବା ଭଳି ସମସ୍ତ ପ୍ରକାର ନିତିକାନ୍ତି କରାଯାଇଥାଏ । ବିଶେଷ କରି ଗାନ୍ଧୀଜୟନ୍ତୀ ଓ ବାପୁଙ୍କ ତିରୋଧାନ ଦିବସରେ ଗାନ୍ଧୀଙ୍କ ପ୍ରତିମୂର୍ତ୍ତିରେ ସ୍ବତନ୍ତ୍ର ପୂଜାର୍ଚ୍ଚନା କରାଯାଏ ।
ଦେଶ ଓ ଜାତି ପାଇଁ ବାପୁଙ୍କ ବଳିଦାନକୁ ମନେପକାଇବା ସହ ସମ୍ମାନଦେବା ଉଦ୍ଦେଶ୍ୟରେ ଏଠାରେ ବାପୁଙ୍କୁ ପାର୍ଶ୍ବ ଦେବତା ହିସାବରେ ପୂଜା କରାଯାଉଛି । ଭକ୍ତିପୂତ ମନରେ ବାପୁଜୀଙ୍କ ପୂଜା କରି ଅତୀତର ଗାଥାକୁ ମନେପକାଇଥାନ୍ତି ଭକ୍ତ । ରୀତିନୀତି ଅନୁଯାୟୀ ବାପୁଙ୍କ ପୂଜାର୍ଚ୍ଚନାକୁ ନେଇ ସହରବାସୀ ଗର୍ବ ଅନୁଭବ କରିବା କଥା କହିଛନ୍ତି । ଏହା ସହରବାସୀଙ୍କ ଦେଶଭକ୍ତିର ଏକ ଜ୍ବଳନ୍ତ ଉଦାହାରଣ ହେବାସହ ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ପାଲଟିଛି ।
ଇଟିଭି ଭାରତ, ବ୍ରହ୍ମପୁର
