ବ୍ରହ୍ମପୁର: ଜିଲ୍ଲାରେ ଦିନକୁ ଦିନ ବଢିଚାଲିଛି ଦାଦନ ଦୁଃଖ କାହାଣୀ । ଦାଦନ ଖଟିବାକୁ ବାହାରକୁ ଯାଉଥିବା ଶ୍ରମିକଙ୍କ ମୃତଦେହ ଓଡିଶାକୁ ଫେରୁଛି । ଆଉ ଦୁଃଖରେ ଜର୍ଜରିତ ହେଉଛି ପରିବାର । ନିକଟରେ ସେହିପରି ଆଉ ଜଣେ ଓଡିଆ ଦାଦନ ଶ୍ରମିକଙ୍କ ମୃତଦେହ ନିଜ ଗ୍ରାମକୁ ଫେରିଛି ।
ସୂଚନାଯୋଗ୍ୟ ଯେ ଖଲ୍ଲିକୋଟ ଥାନା ଅନ୍ତର୍ଗତ ତେନ୍ତୁଳିଆପଲ୍ଲୀ ଗ୍ରାମପଞ୍ଚାୟତର କୈଠଡ ଗ୍ରାମର ଶ୍ରମିକ ଜୟ ଦଳେଇ ଦୁବାଇରେ କାମ କରୁଥିଲେ । ଅଧିକ ରୋଜଗାର କରିବା ପାଇଁ ୧୮ ମାସ ପୂର୍ବରୁ ସେ ଦୁବାଇ ଯାଇଥିଲେ । ହେଲେ କୌଣସି କାରଣରୁ ସେଠାରେ ଗତ ୧୬ ତାରିଖ ଦିନ ତାଙ୍କର ମୃତ୍ୟୁ ଘଟିଥିଲା ।
ସେ କାମ କରୁଥିବା କମ୍ପାନୀର କର୍ତ୍ତୁପକ୍ଷ ପରିବାରକୁ ଫୋନ କରି ଏହି କଥା ଜଣାଇଥିଲେ । ଏହାପରେ ଜୟଙ୍କ ମୃତଦେହ ଫେରାଇ ଆଣିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଉଦ୍ୟମ କରାଯାଇଥିଲା । ଶେଷରେ ସାତ ଦିନ ପରେ ମୃତଦେହ ଗ୍ରାମରେ ପହଞ୍ଚିଛି । ଏଥିରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଓ ରାଜ୍ୟ ଶ୍ରମ କମିଶନର ମୁଖ୍ୟ ଭୂମିକା ନେଇଥିଲେ ।
ଓଡିଆ ଦାଦନ ଶ୍ରମିକ ମରଶରୀର ଭୁବନେଶ୍ବର ବିମାନ ବନ୍ଦରରେ ପହଞ୍ଚିବା ପରେ ଏହାକୁ ଏକ ଆମ୍ବୁଲାନ୍ସ ଯୋଗେ ନିଜ ଗ୍ରାମକୁ ଅଣାଯାଇଥିଲା । ଏଥିରେ ଖଲ୍ଲିକୋଟ ବିଧାୟିକା ଶ୍ରୀମତୀ ସୁର୍ଯ୍ୟମଣି ବୈଦ୍ୟ ଓ ଜିଲ୍ଲା ଶ୍ରମ ଅଧିକାରୀ ଶିବ ନାରାୟଣ ସାହୁ ସହଯୋଗ କରିଥିଲେ । ତେବେ ମରଶରୀର ଗ୍ରାମରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା ।
ମର ଶରୀର ନିକଟରେ ବହୁ ବ୍ୟକ୍ତିବିଶେଷ ପହଞ୍ଚି ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ । ଜିଲ୍ଲା ପ୍ରଶାସନ ପକ୍ଷରୁ ମୃତ ଶ୍ରମିକଙ୍କ ପରିବାରକୁ ରେଡକ୍ରସରୁ 20 ହଜାର ଟଙ୍କା ପ୍ରଦାନ କରାଯାଇଛି । ତେବେ ଜୟଙ୍କ ମୃତ୍ୟୁ ପରେ ପତ୍ନୀ ହୀରା ଦଳେଇ ଓ ଦୁଇ ପୁଅ ଏବଂ ଦୁଇ ଝିଅ ଏକ ପ୍ରକାର ବେସାହାରା ହୋଇପଡିଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
