ବ୍ରହ୍ମପୁର: ରେଶମ ସହର ବ୍ରହ୍ମପୁରକୁ ସବୁଜ ସୁନ୍ଦର ସହର ଭାବରେ ଗଢ଼ି ତୋଳିବା ପାଇଁ ପ୍ରଶାସନ ପକ୍ଷରୁ ଜାରି ରହିଛି ଉଦ୍ୟମ । ଏ ନେଇ ସହରକୁ ପୂର୍ଣ୍ଣ ବାହ୍ୟ ମଳତ୍ୟାଗ ସହର ଭାବରେ ପରିଣତ କରିବାକୁ ଚାଲିଛି ପଦକ୍ଷେପ । ହେଲେ ସହରର ବିଭିନ୍ନ ସ୍ଥାନରେ ମହାନଗର ନିଗମ ପକ୍ଷରୁ ସାଧାରଣ ଜନତାଙ୍କ ବ୍ୟବହାର ପାଇଁ ନିର୍ମାଣ ହୋଇଥିଲା ପରିସ୍ରାଗାର । କିନ୍ତୁ ନିର୍ମାଣ ହୋଇଥିବା ପରିସ୍ରାଗାର ଗୁଡିକରେ ତାଲା ଝୁଲିଥିବା ନେଇ ଅଭିଯୋଗ କରିଛନ୍ତି ବ୍ରହ୍ମପୁର ବାସିନ୍ଦା ।
ସୂଚନାମୁତାବକ, ବ୍ରହ୍ମପୁର ସହରକୁ ସବୁଜ ସୁନ୍ଦର ସହର ଭାବରେ ପରିଣତ କରିବା ପାଇଁ ଗତ କିଛି ମାସ ଧରି ପ୍ରଶାସନ ପକ୍ଷରୁ ଜାରି ରହିଛି ପ୍ରୟାସ
। ଏହି କ୍ରମରେ ସହରର ବିଭିନ୍ନ ବସ୍ତି ଠାରୁ ଆରମ୍ଭ କରି ପ୍ରମୁଖ ସ୍ଥାନରେ ଶୌଚାଳୟ ନିର୍ମାଣ କରାଯିବା ସହ ଏହାର ବ୍ୟବହାର କରିବା ଉପରେ ଗୁରୁତ୍ୱ ଦିଆଯାଇଥିଲା ।
ହେଲେ ଉଦଘାଟନ ପରଠାରୁ ମାତ୍ର କିଛି ଦିନ ପାଇଁ ଖୋଲିଥିବା ଏହି ସମସ୍ତ ପରିସ୍ରାଗାର ଏବେ ତାଲା ପଡିରହିଛି । ବହୁ ଅର୍ଥ ବିନିଯୋଗରେ ନିର୍ମାଣ ହୋଇଥିବା ଏହି ପରିସ୍ରାଗାରରେ ଏଭଳି ସ୍ଥାନରେ ତାଲା ପଡି ରହୁଥିବାରୁ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ଅନ୍ୟପଟେ ବ୍ରହ୍ମପୁର ସହରର ବହୁ ସ୍ଥାନରେ ରହିଥିବା ଏହି ପରିସ୍ରାଗାରରେ ପାଣି ଆସୁନଥିବା ଦେଖାଯାଇଛି । ସେପଟେ ସହରର ପ୍ରମୁଖ ସ୍ଥାନରେ ତାଲା ପଡି ରହିଥିବା ଶୌଚାଳୟ ଓ ପରିସ୍ରାଗାର ଗୁଡିକ ଖୁବଶୀଘ୍ର ଖୋଲାଯିବାକୁ ବ୍ୟବସ୍ଥା କରାଯାଉଥିବା କହିଛନ୍ତି ମହାନଗର ନିଗମର ସ୍ବାସ୍ଥ୍ୟ ଅଧିକାରୀ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
