ବ୍ରହ୍ମପୁର: ବିନା ପରିଶ୍ରମରେ ଟଙ୍କା ଉପାର୍ଜନର ଲୋଭ ଦେଖାଇ ସଟ୍ଟା ବ୍ୟବସାୟୀ କରୁଛି ବ୍ୟବସାୟ । ବ୍ରହ୍ମପୁର ପୋଲିସ ହାତରେ ଧରାପଡିଛନ୍ତି ଅନଲାଇନ୍ ବେଟିଂ ଗ୍ୟାଙ୍ଗର ପାଞ୍ଚ ସଦସ୍ୟ । ବ୍ରହ୍ମପୁର ସହରର ଗୋଷାଣିନୂଆଗାଁ ଥାନା ପୋଲିସ ଏଭଳି ଏକ ଗ୍ୟାଙ୍ଗକୁ କାବୁ କରିବାରେ ସକ୍ଷମ ହୋଇଛି ।
ସୂଚନାଅନୁସାରେ, ଅନଲାଇନ୍ ଆପ୍ ମାଧ୍ୟମରେ ଏହି ଗ୍ୟାଙ୍ଗ୍ ବିଭିନ୍ନ ବୁକିଙ୍କ ନିକଟକୁ ଆଇପିଏଲ ମ୍ୟାଚ୍ ସମୟରେ ଲିଙ୍କ ପଠାଇ ବ୍ୟାଟିଂ କରି ଆସୁଥିବା ଖବର ପାଇ ବ୍ରହ୍ମପୁର ପୋଲିସର ଏକ ସ୍ୱତନ୍ତ୍ର ଟିମ୍ ଘୋଷାଣି ନୂଆଗାଁ ଥାନା ଅଞ୍ଚଳରେ ଚଢାଉ କରିଥିଲା । ୫ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ନଗଦ ୪ ଲକ୍ଷ ୫୬ହଜାର ନଅ ଶହ ଟଙ୍କା ସମେତ ୨୦୩ .୯୬ ଗ୍ରାମ ସୁନା ଅଳଙ୍କାର ଏବଂ ୯ ଗୋଟି ମୋବାଇଲ୍ ଫୋନ୍ ସମେତ ଏକ ଦାମୀ କାରକୁ ଜବତ କରିଛି ପୋଲିସ ।
ଗିରଫ ହୋଇଥିବା ଅଭିଯୁକ୍ତମାନେ ହେଲେ ବ୍ରହ୍ମପୁର ସହର ଉପକଣ୍ଠ ଗୋଳନ୍ଥରା ଥାନା ଅନ୍ତର୍ଗତ କନିଷିହାଟ ଅଞ୍ଚଳର ଅଣ୍ଡାଦିପୁ ଓରଫ ଦିପୁ ନାୟକ ଏବଂ କନିଷି ଅଞ୍ଚଳର କୁଟୁ ରାଉତ, ଅଶ୍ୱିନୀ କୁମାର ପାତ୍ର ଓ ଗୋପିନାଥ ମହାରଣା ସମେତ କବିସୂର୍ଯ୍ୟନଗର ଅଞ୍ଚଳର ପ୍ରଶାନ୍ତ କୁମାର ସାହୁ । ଏପରିକି ଏହି ଗ୍ୟାଙ୍ଗର ମୁଖ୍ୟ କୁହାଯାଉଥିବା ଦିପୁ ନାୟକ ଓରଫ ଅଣ୍ଡା ଦିପୁ ମଧ୍ୟ ପୂର୍ବରୁ ଏହି ମାମଲାରେ ଗିରଫ ହୋଇଥିବା ବ୍ରହ୍ମପୁର ଏସ୍.ପି ଶ୍ରବଣ ବିବେକ ଏମ୍ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
