ବ୍ରହ୍ମପୁର: ଗଞ୍ଜାମ ଜିଲ୍ଲା ପାଟପୁର ଥାନା ଅନ୍ତର୍ଗତ ଚାକୁଣ୍ଡାପଲ୍ଲୀ, କୃଷ୍ଣସାଗର ଓ ବିଛାପଟ ଭଳି ପାହାଡିଆ ଦୁର୍ଗମ ଜଙ୍ଗଲରେ ଅବକାରୀ ବିଭାଗର ଅତର୍କିତ ଚଢାଉ । ଘଟଣାସ୍ଥଳରୁ ବିପୁଳ ପରିମାଣର ଅପମିଶ୍ରିତ ମଦପୋଚ ନଷ୍ଟ କରାଯିବା ସହ ରନ୍ଧା ମଦ ଜବତ । ଗଞ୍ଜାମ ଜିଲ୍ଲାପାଳ ଓ ବ୍ରହ୍ମପୁର ଅବକାରୀ ନିରୀକ୍ଷକଙ୍କ ନିର୍ଦ୍ଦେଶକ୍ରମେ ଗୁରୁବାର ଦିଗପହଣ୍ଡି ଅବକାରୀ ବିଭାଗ ଏହି ଚଢାଉ କରିଛି ।
ସୂଚନା ଅନୁଯାୟୀ, ପାଟପୁର ଥାନା ଅଞ୍ଚଳର ଦୁର୍ଗମ ପାହାଡ଼ିଆ ରାସ୍ତାରେ ରହିଥିବା ଇଲାକାରେ ଦେଶୀ ମଦ ପ୍ରସ୍ତୁତି ନେଇ ସୂଚନା ମିଳିଥିଲା । ଏହାପରେ ଦିଗପହଣ୍ଡି ଅବକାରୀ ଉପନିରୀକ୍ଷକ ଅଭିରାମ ସାହୁଙ୍କ ନେତୃତ୍ବରେ ଅବକାରୀ ବିଭାଗ କର୍ମଚାରୀ ସେଠାରେ ଚଢାଉ କରିଥିଲେ । ଚଢାଉ ସମୟରେ ୧୯୦୦ କେଜି ଗୁଡମିଶ୍ରିତ ପୋଚକୁ ନଷ୍ଟ କରିବା ସହ ରନ୍ଧାମଦ ଜବତ ହୋଇଛି । ଘଟଣାରେ କେହି ଗିରଫ ହୋଇନଥିବା ସୂଚନା ମିଳିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
