ବ୍ରହ୍ମପୁର: ଗଞ୍ଜାମ ଜିଲ୍ଲାରେ ନଦୀ ତଟର ସୁରକ୍ଷା ଓ ବାଲି ଚୋରା ଚାଲାଣ ବନ୍ଦ କରିବା ଦାବି ନେଇ ଗୁରୁବାର ଆଇଏନଟିୟୁସି ପକ୍ଷରୁ ବ୍ରହ୍ମପୁରରେ ପ୍ରତିବାଦ କରାଯାଇଛି ।
ଦକ୍ଷିଣାଞ୍ଚଳ ରାଜସ୍ୱ କମିଶନରଙ୍କ କାର୍ଯ୍ୟାଳୟ ସମ୍ମୁଖରେ ଏ ନେଇ ଭାରତୀୟ ରାଷ୍ଟ୍ରୀୟ ମଜଦୁର କଂଗ୍ରେସ ପକ୍ଷରୁ ଯେଭଳି ଜିଲ୍ଲାରେ ନିୟମିତ ଭାବରେ ପ୍ରତ୍ୟେକ ଦିନ ଶହ ଶହ ଟ୍ରକ, ଟ୍ରାକ୍ଟର ଯୋଗେ ବାହାରକୁ ବାଲି ଚାଲାଣ ହେଉଛି । ଏପରିକି ରାଜ୍ୟ ବାହାରକୁ ଏବଂ ଅନ୍ୟ ଦେଶକୁ ମଧ୍ୟ ସମୁଦ୍ର ପଥରେ ବାଲି ନିଆଯିବା ଘଟଣାକୁ ସରକାର ଗୁରୁତ୍ୱର ସହ ଦୃଷ୍ଟି ଦେବା ସହ ରାତିଅଧିଆ ଚୋରାଚାଲାଣ ଘଟଣାର ତଦନ୍ତ ପାଇଁ ଦାବି କରାଯାଇଛି ।
ଏନେଇ ଏକ ଦାବିପତ୍ର ଦକ୍ଷିଣାଞ୍ଚଳ ରାଜସ୍ୱ କମିଶନରଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ନିକଟକୁ ପ୍ରଦାନ କରାଯିବା ସହ ବାଲି ବାବଦରେ ସରକାର ଯେତିକି ରାଜସ୍ୱ ପାଉନାହାଁନ୍ତି, ତା ଠାରୁ ବେଶୀ ଅର୍ଥ ରାସ୍ତା ମରାମତି ଓ ନିର୍ମାଣ ବାବଦରେ ବ୍ୟୟ ହେଉଥିବା କୁହାଯାଇଛି । ଜିଲ୍ଲାରେ ୧୧୭ଟି ସୈରାତ୍ ରହିଥିବାବେଳେ ସେଥିରୁ ୭୮ଟି ବାଲି ସୈରତ୍ ନିଲାମ୍ ହୋଇଛି । ସେପଟେ ବାଲି ଖନନ ଯୋଗୁଁ ନଦୀ ପଠା ଗଭୀର ହୋଇ କୂଳ କ୍ଷତିଗ୍ରସ୍ତ ହୋଇଛି । ଯାହାକି ବର୍ଷା ଦିନ ମାନଙ୍କରେ ବହୁ ଜମି ବାଲିଚର ହେବା ସହ ବହୁ ନଦୀ କୂଳିଆ ଗ୍ରାମରେ ପାଣି ପଶୁଛି ଓ ନଦୀକୂଳ ଖାଇବା ଯୋଗୁଁ ବହୁ ଚାଷୀଙ୍କ ଜମି ନଦୀଗର୍ଭରେ ମିଶିଯିବା ଫଳରେ ଅନେକ ହଇରାଣ ହରକତ ହେଉଥିବା କୁହାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
