ବ୍ରହ୍ମପୁର: କୋରୋନା ରୋଗୀଙ୍କ ସହାୟତା ପାଇଁ ଇଞ୍ଜିନିୟରିଂ ଛାତ୍ର ପ୍ରସ୍ତୁତ କଲେ ରୋବର୍ଟ । ବ୍ରହ୍ମପୁର ସହରର ରୋଲାଣ୍ଡ ଇନଷ୍ଟିଚ୍ୟୁଟ୍ର ବିଦ୍ୟାର୍ଥୀ ବଳରାମ ସାହୁ କରିଛନ୍ତି ଏଭଳି ଏକ ପ୍ରୟାସ । କୋରୋନା ଚିକିତ୍ସାରେ ସାମିଲ ହୋଇଥିବା ଡାକ୍ତର, ନର୍ସ , ପାରା ମେଡିକାଲ କର୍ମଚାରୀଙ୍କ କାମ କମାଇବା ସହ ସେମାନଙ୍କୁ ସୁରକ୍ଷା ଦେବା ପାଇଁ ଏପରି ଏକ ରୋବର୍ଟ ତିଆରି କରିଛନ୍ତି ସେ । ରୋଗୀଙ୍କ ସ୍ବାସ୍ଥ୍ୟାବସ୍ଥା ଅନୁଧ୍ୟାନ କରିବା ସହ ଏଥିରେ ସେମାନଙ୍କୁ ଔଷଧ ଯୋଗାଇବାର ମଧ୍ୟ ବ୍ୟବସ୍ଥା ରହିଛି ।
କୋଭିଡ୍ ହସ୍ପିଟାଲରେ ଅନେକ କାମ ମନୁଷ୍ୟର ବିନା ସହାୟତାରେ କରିବା ପାଇଁ ତିଆରି ହୋଇଥିବା ଏହି ରୋବର୍ଟ ପାଖକୁ ହାତ ନେଲେ ସେ ସଙ୍ଗେସଙ୍ଗେ ସାନିଟାଇଜ କରୁଛି । ତା ପାଖକୁ ଗଲେ ସାମାଜିକ ଦୂରତା ଦୃଷ୍ଟିରୁ ମୁଣ୍ଡ ହଲାଇ ମନା କରୁଛି । ହ୍ୟାଣ୍ଡସେକ କରିବାକୁ ହାତ ନେଲେ ସେ ହାତ ପଛକୁ ନେଇଯାଉଛି । ସେହିପରି ରୋବର୍ଟରେ କ୍ୟାମେରା ଲଗାଇ ରୋଗୀମାନଙ୍କ ସହିତ ଡାକ୍ତରମାନେ ପରାମର୍ଶ କରିବାର ବ୍ୟବସ୍ଥା ମଧ୍ୟ ଅଛି । ତେବେ ଏହି ରୋବର୍ଟଟିକୁ ମୋବାଇଲ ମାଧ୍ୟମରେ ପରିଚାଳନା କରାଯାଉଥିବାବେଳେ ଏହାକୁ ତିଆରି କରିବା ଲାଗି ତାଙ୍କୁ ପ୍ରାୟ 3 ହଜାର ଟଙ୍କା ଓ 10 ଦିନ ସମୟ ଲାଗିଥିଲା ।
ତେବେ କେନ୍ଦ୍ରସରକାର ଆତ୍ମନିର୍ଭର ଭାରତ କଥା କହୁଥିବାବେଳେ ଏପରି ପ୍ରତିଭାଙ୍କୁ ସହଯୋଗର ହାତ ବଢାଇଲେ ଏମାନେ ଦିନେ ଦେଶକୁ ଅନେକ କିଛି ଦେଇପାରିବେ ବୋଲି ଆଶା କରାଯାଉଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
