ବ୍ରହ୍ମପୁର: ଉନ୍ନୟନମୂଳକ କାର୍ଯ୍ୟ ପାଇଁ ଆଗାମୀ ଦୁଇ ମାସ ପର୍ଯ୍ୟନ୍ତ ବନ୍ଦ ରହିବ ସିଟି ବସଷ୍ଟାଣ୍ଡ । ଏଥିସହ ସମସ୍ତ ବେସରକାରୀ ବସକୁ ସହର ଉପକଣ୍ଠ ହଳଦିଆପଦର ନୂତନ ବସଷ୍ଟାଣ୍ଡକୁ ସ୍ଥାନାନ୍ତରିତ କରାଯିବ । ପ୍ରଶାସନର ଏଭଳି ନିଷ୍ପତ୍ତିକୁ ବିରୋଧ କରି ବସ ମାଲିକ ସଂଘ ପକ୍ଷରୁ ବସ ଚଳାଚଳକୁ ବନ୍ଦ କରାଯାଇଛି ।
ଘୋରଇ ବସ ମାଲିକ ସଂଘର ଏକ ବୈଠକରେ ବସଷ୍ଟାଣ୍ଡ ସ୍ଥାନାନ୍ତରକୁ ହଳଦିଆପଦରକୁ ନକରାଯାଇ ସହରର ଅନ୍ୟ କୌଣସି ସ୍ଥାନକୁ ପ୍ରଦାନ କରିବାକୁ ଅପିଲ କରାଯାଇଛି । ପ୍ରଶାସନର ଏଭଳି ପଦକ୍ଷେପକୁ ଦୃଢ ନିନ୍ଦା କରିଛି ଘରୋଇ ବସ ମାଲିକ ସଂଘ । କିନ୍ତୁ ପ୍ରଶାସନ ଏଥିପ୍ରତି କୌଣସି ଦୃଷ୍ଟି ନଦେଲେ ଆଗାମୀ ଦିନରେ ଆନ୍ଦୋଳନ ବ୍ୟାପକ କରାଯିବ ବୋଲି ଚେତାବନୀ ଦେଇଛି ସଂଘ । ଅନ୍ୟପଟେ ପ୍ରଶାସନ ପକ୍ଷରୁ ଏହି ଆନ୍ଦୋଳନକୁ ଦୃଷ୍ଟିରେ ରଖି ଓ.ଏସ୍.ଆର୍.ଟି.ସି ପକ୍ଷରୁ ଭଞ୍ଜନଗର , ଫୁଲବାଣୀ ଓ କଟକ ରୁଟରେ ଅତିରିକ୍ତ ଚାରୋଟି ଲେଖାଏଁ ବସ ଚଳାଚଳ କରାଯିବା ସହ ରାୟଗଡା ଏବଂ ଗଜପତିକୁ ଅତିରିକ୍ତ ଦୁଇଟି ବସ ବ୍ୟବସ୍ଥା କରାଯାଇଛି ।
ସେହିପରି ସହରରେ ଚାଲିଥିବା ସିଟି ବସ ସେବା ବୃଦ୍ଧି କରାଯାଇ ଗୋପାଳପୁରରୁ ବ୍ରହ୍ମପୁର ଏବଂ ଦିଗପହଣ୍ଡି ରୁଟରେ ୮ ବସ , ବ୍ରହ୍ମପୁରରୁ ଛତ୍ରପୁର ଓ ଖଲ୍ଲିକୋଟ ମଧ୍ୟରେ ୮ ଟି ବସ ଏବଂ ବ୍ରହ୍ମପୁରରୁ କନିଷି ଦେଇ ଚିକିଟି ପାତ୍ରପୁର ଦେଇ ପାଞ୍ଚଟି ବସ ଏବଂ ବ୍ରହ୍ମପୁରରୁ ହିଞ୍ଜିଳିକୁ ପାଞ୍ଚୋଟି ବସ ସହ ହଳଦିଆପଦର ନୂତନ ବସଷ୍ଟାଣ୍ଡ ଠାରୁ ବ୍ରହ୍ମପୁରକୁ ଅତିରିକ୍ତ ୧୦ ଟି ସର୍ଟଲ ବସ୍ ସେବା ଯୋଗାଇ ଦିଆଯିବ ବୋଲି କୁହାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
