ବ୍ରହ୍ମପୁର: ଗତ ଦୁଇ ବର୍ଷ ଧରି କୋଭିଡ ମହାମାରୀକୁ ଯୋଗୁଁ ନିଜ ଘର ମଧ୍ୟରେ ରହିଆସୁଥିବା ପର୍ଯ୍ୟଟକଙ୍କୁ ଶାରଦୀୟ ପୂଜାରେ ଆକୃଷ୍ଟ କରିବା ପାଇଁ ଭିନ୍ନ ପ୍ରୟାସ ।
ସ୍ବସ୍ତି ଚିଲିକା ରିସୋର୍ଟରେ ସ୍ବତନ୍ତ୍ର ଭାବରେ ଆୟୋଜିତ କରାଯାଇଛି ବଙ୍ଗାଳୀ ଫୁଡ୍ ଫେଷ୍ଟିଭାଲ । ଓଡ଼ିଆ ଏବଂ ବଙ୍ଗଳାର ମିଶ୍ରଣରେ ରହିଥିବା ଅନେକ ସୁସ୍ବାଦୁ ଖାଦ୍ୟ ରହିଛି ଏହି ଫେଷ୍ଟିଭାଲର ଅନ୍ୟତମ ଆକର୍ଷଣ ।
ବଙ୍ଗାଳୀମାନଙ୍କ ପ୍ରିୟ ମାଛେର ଖୋଲ, ସରଷେ ଇଲିସ, କଷା ମାଂସ, ଚିଲିକା ଚିଙ୍ଗୁଡ଼ି, କାଙ୍କଡା, ଖଇଙ୍ଗା ଭଳି ଅନେକ ମାଛ ସାଙ୍ଗଙ୍କୁ ସୁସ୍ବାଦୁ ଆମିଷ ଓ ନିରାମିଷ ଭୋଜନର ଆୟୋଜନ ହୋଇଛି । ଏଥି ସହିତ ରସଗୋଲା, ମିଷ୍ଠି ଭଳି ଭିନ୍ନଭିନ୍ନ ମିଠା ସହିତ ଅନେକ ପ୍ରକାର ବ୍ୟଞ୍ଜନ ରହିଛି ଏହାର ଆକର୍ଷଣ । ଯାହାର ମଜ୍ଜା ନେଉଛନ୍ତି ଏଠାକୁ ଆସୁଥିବା ପର୍ଯ୍ୟଟକ ।
ସେପଟେ ଫୁଡ୍ ଫେଷ୍ଟିଭାଲରେ ମୋଟ ୫୮ ପ୍ରକାର ବଙ୍ଗାଳୀ ଖାଦ୍ୟ ପ୍ରସ୍ତୁତ କରାଯାଇଛି। ଉଭୟ ବଙ୍ଗ ଏବଂ ଓଡ଼ିଶା ବାସୀଙ୍କ ମନପସନ୍ଦର ସମସ୍ତ ଖାଦ୍ୟ ରହିଥିବାରୁ ଏହା ସମସ୍ତଙ୍କ ପାଇଁ ରୁଚିକର ହେବ ବୋଲି କହିଛନ୍ତି ରିସର୍ଟ କର୍ତ୍ତୃପକ୍ଷ ।
ଏପରିକି ସମସ୍ତ ବର୍ଗର ଲୋକଙ୍କୁ ସୁହାଇଲା ଭଳି ଦର ଧାର୍ଯ୍ୟ କରାଯାଇଛି । ଏଠାରୁ ପାର୍ସଲ ମଧ୍ୟ ନେବାର ବ୍ୟବସ୍ଥା କରାଯାଇଛି । ଏହି ଫେଷ୍ଟିଭାଲ ଆସନ୍ତା ୧୫ ତାରିଖ ପର୍ଯ୍ୟନ୍ତ ଜାରି ରହିବ ।
ରାଜଧାନୀ ଭୁବନେଶ୍ଵରରୁ ବ୍ରହ୍ମପୁର ଆସିବା ରାସ୍ତାର ଖଲ୍ଲିକୋଟ ନିକଟବର୍ତ୍ତୀ ଓଡ଼ିଆ ଆଲପୁର ନିକଟବର୍ତ୍ତୀ ଚିଲିକା କୂଳରେ ସ୍ଥାପନ ହୋଇଥିବା ଏହି ରିସୋର୍ଟରେ ଚଳିତ ବର୍ଷ ଆରମ୍ଭ ହୋଇଥିବା ବଙ୍ଗାଳୀ ଫୁଡ୍ ଫେଷ୍ଟିଭାଲ ସମସ୍ତଙ୍କ ପସନ୍ଦ ହେବ ବୋଲି ଆଶା କରାଯାଉଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
