ବ୍ରହ୍ମପୁର: ଗତ କିଛି ଦିନ ତଳେ ସାମ୍ନାକୁ ଆସିଥିଲା ଦିଗପହଣ୍ଡି ତହସିଲଦାରଙ୍କୁ ଆକ୍ରମଣ ଘଟଣା । କୋଭିଡ ନିୟମ ଉଲ୍ଲଙ୍ଘନ କରି ଗ୍ରାମରେ ଗଣେଶ ପୂଜା କରିବା ସହ ଦୋକାନ ଖୋଲି ବ୍ୟବସାୟ କରୁଥିବା ବେଳେ ସମ୍ପୃକ୍ତ ତହସିଲଦାର ଚଢାଉ କରିଥିବା ବେଳେ ଏହାର ବିରୋଧ କରି ଗ୍ରାମବାସୀ ତାଙ୍କୁ ଆକ୍ରମଣ ଉଦ୍ୟମ କରିଥିଲେ । ଏନେଇ ଥାନାରେ ହତ୍ୟା ଉଦ୍ୟମରେ ଏକ ମାମଲା ରୁଜୁ ହେବା ପରେ ଗ୍ରାମର ଶାନ୍ତି କମିଟି ମାଧ୍ୟମରେ ସମସ୍ତ ଗ୍ରାମବାସୀ ନିଜର ଦୋଷ ସ୍ବୀକାର କରିବା ସହ କ୍ଷମା ପ୍ରାର୍ଥନା କରିଥିବା ଜଣା ପଡିଛି ।
ସୂଚନା ଅନୁଯାୟୀ ଗଣେଶ ପୂଜା ଅର୍ଥାତ ଗତ ଶନିବାର ରାତିରେ ଜିଲ୍ଲାର ଦିଗପହଣ୍ଡି ବ୍ଳକ ଅନ୍ତର୍ଗତ କେ.ନୂଆଗାଁ ଥାନା ଅଧିନସ୍ଥ ଚୌଧୁରୀ ଟିକରପଡା ଗ୍ରାମରେ କୋଭିଡ ନିୟମର ଉଲ୍ଲଙ୍ଘନ ହେଉଥିବା ନେଇ ଅଭିଯୋଗ ହୋଇଥିଲା । ଏନେଇ ଖବର ପାଇବା ପରେ ଜିଲ୍ଲା ପ୍ରଶାସନର ନିର୍ଦ୍ଦେଶ କ୍ରମେ ତହସିଲଦାର ଅଦ୍ବୈତ କୁମାର ସ୍ବାଇଁ ଘଟଣାସ୍ଥଳକୁ ଯାଇଥିବା ବେଳେ ଗ୍ରାମବାସୀ ତାଙ୍କୁ ଦୁର୍ବ୍ୟବହାର କରିବା ସହ ତାଙ୍କ ଗାଡ଼ିକୁ ପଥର ମାଡ଼ କରି ଭଙ୍ଗାରୁଜା କରିଥିଲେ । ଏନେଇ ଶାନ୍ତି କମିଟି ମାଧ୍ୟମରେ ଗ୍ରାମବାସୀ ନିଜ ଦୋଷ ସ୍ବୀକାର କରିବା ସହ ପ୍ରଶାସନକୁ କ୍ଷମା ପ୍ରାର୍ଥନା କରିଥିବା ଜଣାପଡିଛି ।
ଏହି ଘଟଣାକୁ ନେଇ ପୂର୍ବରୁ ତହସିଲଦାରଙ୍କ ପକ୍ଷରୁ କେ. ନୂଆଗାଁ ଥାନାରେ 20 ଜଣଙ୍କ ନାମରେ ଲିଖିତ ଅଭିଯୋଗ କରାଯାଇଥିବା ବେଳେ ଏହା ପରେ ଗ୍ରାମରେ ପୋଲିସର ଫ୍ଲାଗମାର୍ଚ୍ଚ ଆରମ୍ଭ ହୋଇଥିଲା । ପ୍ରଶାସନର ଏଭଳି କାର୍ଯ୍ୟାନୁଷ୍ଠାନ ଭୟରେ ଗ୍ରାମ ଏକ ପ୍ରକାର ପୁରୁଷଶୂନ୍ୟ ହୋଇଯାଇଥିବା ବେଳେ ସ୍ଥାନୀୟ ସରପଞ୍ଚ, ସମିତି ସଭ୍ୟ, ୱାର୍ଡ ସଭ୍ୟ ଓ ବୁଦ୍ଧିଜୀବିମାନଙ୍କୁ ନେଇ ଗ୍ରାମରେ ହିଂସାତ୍ମକ ମନୋଭାବ ଦୂର କରିବା ପାଇଁ ଏକ ଶାନ୍ତି କମିଟି ଗଠନ କରାଯାଇଥିଲା । ଏହି କମିଟି ମାଧ୍ୟମରେ ପ୍ରଥମେ ଗ୍ରାମବାସୀମାନେ ସ୍ଥାନୀୟ ତହସିଲଦାରଙ୍କ କାର୍ଯ୍ୟାଳୟରେ ପହଞ୍ଚି ତହସିଲଦାରଙ୍କ ନିକଟରେ ନିଜେ କରିଥିବା ଭୁଲକୁ ସ୍ବୀକାର କରିବା ସହ ହାତ ଯୋଡି କ୍ଷମା ପ୍ରାର୍ଥନା କରିଥିଲେ ।
ଆଗକୁ ଏପରି ଭୁଲ୍ ନ ଦୋହରିବା ପାଇଁ ଲିଖିତ ଆକାରରେ ପ୍ରତିଶ୍ରୁତି ଦେଇଥିଲେ । ପରେ ବ୍ରହ୍ମପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଉପଜିଲ୍ଲାପାଳ ସିନ୍ଧେ ଦତ୍ତାତ୍ରୟ ଭାଉ ସାହେବଙ୍କୁ ଏହାର ନକଲ କପି ଦେବା ସହ କ୍ଷମା ମାଗିଥିବା ଜଣାପଡିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
