ବ୍ରହ୍ମପୁର: ସର୍ବଭାରତୀୟ ସ୍ତରରେ ପାଞ୍ଚ ଲକ୍ଷ ଲୋକଙ୍କୁ ହୃଦୟ ପୁନଃ ସଞ୍ଚାଳନ ଉପରେ ଦିଆଯିବ ତାଲିମ । ବିଶ୍ବ ନିଶ୍ଚେତକ ଦିବସ ଅବସରରେ ଏଭଳି ନିଷ୍ପତ୍ତି ନିଆଯାଇଥିବା ସୂଚନା ଦେଇଛନ୍ତି ବ୍ରହ୍ମପୁର ମହାରାଜା କୃଷ୍ଣଚନ୍ଦ୍ର ଗଜପତି ଭେଷଜ ମହାବିଦ୍ୟାଳୟର ନିଶ୍ଚେତକ ବିଭାଗର ମୁଖ୍ୟ ।
ହୃଦଘାତରେ ଅଚେତ ହୋଇଯାଉଥିବା ବ୍ୟକ୍ତିର ହୃତପିଣ୍ଡକୁ ଜଣେ ସାଧାରଣ ଲୋକ ବି ପୁଣି ସଞ୍ଚାଳନ କରିପାରିବ ସେ ବିଷୟରେ ଏମକେସିଜି ବହିଃବିଭାଗ ସମୁଖରେ ସାଧାରଣ ଲୋକଙ୍କୁ ତାଲିମ ଦିଆଯାଇଛି । ପୋଲିସ ତଥା ଅଗ୍ନିଶମ ବିଭାଗର କର୍ମଚାରୀଙ୍କ ଠାରୁ ଆରମ୍ଭ କରି ରାଜ୍ୟରେ ଚଳିତବର୍ଷ ପ୍ରାୟ ପାଞ୍ଚ ହଜାର ଲୋକଙ୍କୁ ଏଭଳି ତାଲିମ ପ୍ରଦାନ କରାଯିବ ବୋଲି କୁହାଯାଇଛି । ଏହାଦ୍ବାରା ଯେ କୌଣସି ସ୍ଥାନରେ କୌଣସି ବ୍ୟକ୍ତି ନିଜର ଦୁଇ ହାତର ସହାୟତାରେ ଗୋଟିଏ ବ୍ୟକ୍ତିକୁ ପୁଣି ଜୀବନ ଦାନ କରିପାରିବେ । ମୁଖ୍ୟତ ହୃତପିଣ୍ଡ ୮ ରୁ ୧୦ ମିନିଟ୍ ବନ୍ଦ ହୋଇଗଲେ ତଥା ନାଡିରେ ଅନିୟମିତତା ଦେଖାଦେଲେ ମସ୍ତିଷ୍କ ,ହୃତପିଣ୍ଡ ଓ ବୃକକ୍ କୁ ରକ୍ତ ସଞ୍ଚାଳନ ବନ୍ଦ ହୋଇଯାଇଥାଏ । ଯାହା ଫଳରେ ଅମ୍ଲଜାନ ଅଭାବ ଲୋକଙ୍କୁ ମୃତ୍ୟୁମୁଖକୁ ଟାଣି ନେଇଥାଏ । ସେଭଳି କ୍ଷେତ୍ରରେ ଏହି ପ୍ରଣାଳୀ ପ୍ରଯୋଗ କରି ଲୋକଟିକୁ ଜୀବିତ ରଖାଯାଇପାରିବ ।
ରିପୋର୍ଟ ଅନୁଯାୟୀ ହୃଦଘାତ ହେଲେ ୧୦ ଜଣଙ୍କ ଭିତରୁ କେବଳ ଦୁଇ ଜଣ ବଞ୍ଚିଥାନ୍ତି ଯାହାକି ଏହି ପ୍ରାଣାଳୀ ଦ୍ବାରା ବଞ୍ଚିବା ହାର ତିନି ଗୁଣ ବଢିଥାଏ ବୋଲି ବ୍ରହ୍ମପୁର ଏମ୍କେସିଜି ପରିସରରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ସୂଚନା ଦିଆଯାଇଛି । ଏହି କାର୍ଯ୍ୟକ୍ରମରେ ବ୍ରହ୍ମପୁର ଏମ୍କେସିଜି ମେଡିକାଲର ଅଧ୍ୟକ୍ଷ ପ୍ରଫେସର ରାଧା ମାଧବ ତ୍ରୀପାଠୀ , ଅଧିକ୍ଷକ ପ୍ରଫେସର ଚରଣ ପଣ୍ଡା , ନିଶ୍ଚେତନ ବିଭାଗର ମୁଖ୍ୟ ପ୍ରଫେସର ଦେବୀ ପ୍ରସାଦ ମହାନ୍ତି , ଡାକ୍ତର ସୁବାସ ସାହୁ ଙ୍କ ସମେତ ବହୁ ବରିଷ୍ଠ ଚିକିତ୍ସକ ମାନେ ଉପସ୍ଥିତ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
