ବ୍ରହ୍ମପୁର: ପଡୋଶୀଙ୍କ ଆକ୍ରମଣରେ ବାପା ଓ ପୁଅ ଆହତ । ମଙ୍ଗଳବାର ଗଞ୍ଜାମ ଦିଗପହଣ୍ଡି ଅନ୍ତର୍ଗତ ଗୋକର୍ଣ୍ଣପୁର ପଞ୍ଚାୟତ ଦକ୍ଷିଣପୁର ଗ୍ରାମରେ ଏଭଳି ଘଟଣା ଘଟିଛି । ପୂର୍ବ ଶତ୍ରୁତା ଯୋଗୁଁ ଆକ୍ରମଣ ହୋଇଥିବା ପ୍ରକାଶ ।
ଆହତଙ୍କ ମଧ୍ୟରେ ଜି. ଯୋଗେନ୍ଦ୍ର ରେଡ୍ଡୀ (50) ଏବଂ ତାଙ୍କ ପୁଅ ଜି . ରାଜେଶ ରେଡ୍ଡୀ ରହିଛନ୍ତି । ଗତ କିଛି ଦିନ ତଳେ ଦକ୍ଷିଣପୁର ଗ୍ରାମରେ ରହୁଥିବା ଜି.ଯୋଗେନ୍ଦ୍ର ରେଡ୍ଡୀଙ୍କର ତାଙ୍କ ଘର ଆଗରେ ଥିବା ପି . ଜାଗିଲି ରେଡ୍ଡୀଙ୍କ ସହ କୌଣସି କଥାକୁ ନେଇ ପାଟିତୁଣ୍ଡ ହୋଇଥିଲା । ଏଥିରେ ଆକ୍ରୋଶ ହୋଇ ଜାଗିଲି, ଯୋଗେନ୍ଦ୍ରଙ୍କ ଘର ଛାତ ପଡୁଥିବା ସମୟରେ ହଠାତ୍ ଆସି ଏକ ଛୁରୀ ସାହାଯ୍ୟରେ ପ୍ରଥମେ ଯୋଗେନ୍ଦ୍ରଙ୍କ ପେଟକୁ ଆକ୍ରମଣ କରିଥିଲେ । ଖବର ପାଇ ପୁଅ ରାଜେଶ ବାପାଙ୍କୁ ବଞ୍ଚାଇବା ପାଇଁ ଆସିବା ବେଳେ ତାଙ୍କ ଉପରକୁ ମଧ୍ୟ ଆକ୍ରମଣ ହୋଇଥିବା ଅଭିଯୋଗ ହୋଇଛି ।
ପରିବାର ଲୋକେ ଆହାତ ଦୁଇ ଜଣଙ୍କୁ ପ୍ରଥମେ ଦିଗପହଣ୍ଡି ମେଡିକାଲରେ ଭର୍ତ୍ତି କରିଥିଲେ । ଏଠାରେ ପ୍ରାଥମିକ ଚିକିତ୍ସା ସରିବା ପରେ ବ୍ରହ୍ମପୁର ବଡ ମେଡିକାଲକୁ ପଠାଇ ଦିଆଯାଇଛି । ଅନ୍ୟପଟେ ଏ ନେଇ ପୋଲିସ ପକ୍ଷରୁ ଅଭିଯୁକ୍ତକୁ ଅଟକ ରଖି ତଦନ୍ତ ଆରମ୍ଭ କରାଯାଇଛି।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
