ବାରିପଦା: ଟୀକା ଦେବାକୁ ଯାଇ ହଟହଟା ହେଲେ ଅଙ୍ଗନବାଡି କର୍ମୀ ଓ ଆଶା ଦିଦି । ଏଭଳି ଅପ୍ରୀତିକର ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଉଦଳା ଥାନା ବଡଖମଣ ପଞ୍ଚାୟତ ତଳସରିଆ ଗ୍ରାମରେ ।
ସୂଚନା ଅନୁଯାୟୀ ୨୮ ତାରିଖ ଅର୍ଥାତ ମଙ୍ଗଳବାର ଦିନ ଗ୍ରାମବାସୀଙ୍କୁ ଟୀକାକରଣ ନେଇ ସଚେତନ କରିବା ସହିତ ଟୀକା ଦେବା ନିମନ୍ତେ ସ୍ଥାନୀୟ ଅଙ୍ଗନବାଡି କର୍ମୀ ଏବଂ ଆଶା ଦିଦି ଗ୍ରାମକୁ ଯାଇଥିଲେ । ହେଲେ ଗ୍ରାମବାସୀମାନେ ଟୀକା ନେବାକୁ ନାରାଜ ହୋଇଥିଲେ । ଏପରିକି କିଛି ଗ୍ରାମବାସୀଙ୍କ ମଧ୍ୟରେ ଟୀକା ନେଲେ ଜୀବନ ଚାଲିଯିବ ବୋଲି ଭ୍ରମ ମଧ୍ୟ ରହିଥିବାରୁ ସେମାନେ ଟୀକା ନେଇ ନ ଥିଲେ । କେବଳ ସେତିକି ନୁହେଁ ଅଙ୍ଗନବାଡି କର୍ମୀ ଏବଂ ଆଶା ଦିଦିଙ୍କୁ ଗ୍ରାମବାସୀମାନେ ଅଟକ ରଖିଥିଲେ ।
ଦୀର୍ଘ ୪ ଘଣ୍ଟାରୁ ଅଧିକ ସମୟ ଧରି ସେମାନଙ୍କୁ ଅଟକ ରଖିଥିବା ବେଳେ ଖବର ପାଇ ଉଦଳା ବିଡିଓ, ତହସିଲଦାର ସେଠାରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହିତ ପୋଲିସ୍ ମଧ୍ୟ ଉତ୍ତ୍ୟକ୍ତ ଗ୍ରାମବାସୀଙ୍କୁ ବୁଝାସୁଝା କରିଥିଲେ ।
ଶେଷରେ ଚାରି ଘଣ୍ଟା ପରେ ଗ୍ରାମବାସୀଙ୍କ ନିକଟରୁ ଅଙ୍ଗନବାଡି କର୍ମୀ ଏବଂ ଆଶା ଦିଦି ମୁକୁଳିପାରି ଥିଲେ । ଅନ୍ୟପଟେ ଏବେ ଧାନକଟା ଚାଲିଥିବାରୁ ଗ୍ରାମବାସୀମାନେ ଟୀକା ନେବାକୁ ନାରାଜ ହୋଇଥିବା କହିଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
