ବାଲେଶ୍ବର: ସଭ୍ୟତା ଠାରୁ ଦୂରରେ, ସମାଜର ଆଢୁଆଳରେ ଥିବା ଆଦିବାସୀଙ୍କ ପାଇଁ ଦେବଦୂତ ସାଜିଛନ୍ତି ବାଲେଶ୍ବର ନୀଳଗିରି ଅଞ୍ଚଳର ଯୁବ ଡାକ୍ତର ସୁରଜ ଜେନା । ନୀଳଗିରି କାନପୁର ଅଞ୍ଚଳର ବ୍ରଜକିଶୋର ଜେନା ଓ ସୁପ୍ରଭାଙ୍କ ପୁଅ ସୁରଜ । ଛୁଟିଦିନରେ ଅପହଞ୍ଚ ଇଲାକାରେ ପହଞ୍ଚି ସେଠାରେ ରହୁଥିବା ଆଦିବାସୀଙ୍କ ଚିକିତ୍ସା କରିବା ସହ ମାଗଣାରେ ଔଷଧ ମଧ୍ୟ ଦେଇ ଆସନ୍ତି ।
ଡାକ୍ତରୀ ପାସ କରି ରାଜ ବରହମପୁର ଡାକ୍ତରଖାନାରେ ନିଯୁକ୍ତି ପାଇଥିବା ସୁରଜ, ଛୁଟିଦିନରେ ଛୁଟନ୍ତି ଆଦିବାସୀ ଅଞ୍ଚଳକୁ । କିଛି ପିଲାଙ୍କ ସହ ନିଜ ଖର୍ଚ୍ଚରେ ଔଷଧ ସାଙ୍ଗରେ ନେଇ ସକାଳୁ ସେ ବାହାରି ପଡନ୍ତି ସେମାନଙ୍କୁ ମାଗଣା ସ୍ବାସ୍ଥ୍ୟସେବା ଯୋଗାଇଦେବାକୁ । ସେଠାରେ ପହଞ୍ଚି ରୋଗୀ ଦେଖିବା ସହ ମାଗଣା ଔଷଧ ବି ଦିଅନ୍ତି ।
ବର୍ତ୍ତମାନ ସୁଦ୍ଧା ଦଲଦଲି, ଚୁଆସାହି, ସନ୍ତରାଗଡିଆ ଓ ଖୁଲିଆ ଆଦି ଅଞ୍ଚଳରେ ମାଗଣା ସ୍ବାସ୍ଥ୍ୟସେବା ଯୋଗାଇ ସାରିଲେଣି ସୁରଜ । ସେପଟେ ଗାଁକୁ ଡାକ୍ତର ଆସିଥିବା ଦେଖି ତାଙ୍କ ଚାରିପାଖରେ ଅନେକ ଲୋକ ବି ରୁଣ୍ଡ ହୁଅନ୍ତି । ଡାକ୍ତରଖାନା ଯାଇ ନପାରି ଝଡାଫୁଙ୍କା ଓ ଚେରମୂଳି ଉପରେ ଭରସା କରୁଥିବା ଆଦିବାସୀମାନେ ଡାକ୍ତରଙ୍କୁ ପାଖରେ ପାଇ ମଝିରେ ମଝିରେ ଏପରି ଆସିବା ପାଇଁ ବି ଅନୁରୋଧ କରୁଛନ୍ତି ।
ତେବେ ସୁରଜଙ୍କ ଏହି କାର୍ଯ୍ୟ ଡାକ୍ତରଖାନା ଆସୁନଥିବା ଆଦିବାସୀଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇଦେବା ସହ ଅନ୍ୟ ଡାକ୍ତରଙ୍କ ପାଇଁ ଉଦାହରଣ ସୃଷ୍ଟି କରିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
