ବାଲେଶ୍ବର: ଅବକାରୀ ବିଭାଗ ଦ୍ବାରା ବିଦେଶୀ ମଦ ଜବତ । ବାଲେଶ୍ଵର ଜିଲ୍ଲା ଅଧିନ ସଦର ଅବକାରୀ ବିଭାଗ ଓ ମୋବାଇଲ ସ୍କ୍ବାର୍ଡର ମିଳିତ ଚଢଉରେ ବିପୁଳ ପରିମାଣର ବିଦେଶୀ ମଦ ତିଆରି ସାମଗ୍ରୀ ଜବତ ସହ ତିନି ଜଣଙ୍କୁ ଗିରଫ କରାଯାଇଛି । ଅବକାରୀ ବିଭାଗ ଖନ୍ତାପଡ଼ା ଥାନା ଜିରତାଳ ଗାଁରେ ଚଢାଉ କରି ନକଲି ମଦପ୍ରସ୍ତୁତ ସାମଗ୍ରୀକୁ ଜବତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରିବାରେ ସମର୍ଥ ହୋଇଥିଲା । ଜିରତାଳ ଅଞ୍ଚଳରେ ଦୁଇ ବର୍ଷ ଧରି ନକଲି ମଦ କାରଖାନା ଚାଲୁ ରହିଥିବା ଖବର ପାଇ ଅବକାରୀ ବିଭାଗ ଚଢ଼ାଉ କରିଥିଲା ।
ଚଢ଼ାଉରେ 300ଟି ନକଲି ବିଦେଶୀ ମଦ ଭର୍ତି ବୋତଲ, 50 ଲିଟର ସ୍ପିରିଟ, 3200ଟି ଲେବେଲ, 700 ଠିପି , 100ଖାଲି ମଦ ବୋତଲ ସହ ଏସେନ୍ସ ଭଳି ସାମଗ୍ରୀ ଜବତ କରିବାରେ ସଫଳ ହୋଇଛି ଅବକାରୀ ବିଭାଗ । ଅଭିଯୁକ୍ତ ମାନେ ମଦ ପ୍ରସ୍ତୁତ ପାଇଁ ସମସ୍ତ ସାମଗ୍ରୀ କଲିକତାରୁ ଆଣୁଥିବା ବେଳେ ବେଆଇନ ଭାବେ ମଦ ପ୍ରସ୍ତୁତ କରି ଗ୍ରାମାଞ୍ଚଳ ମାନଙ୍କରେ ବିକ୍ରି କରୁଥିଲେ ।
ତେବେ ଗିରଫ ୩ ଅଭିଯୁକ୍ତଙ୍କ ମଧ୍ୟରେ ଜଣେ ଯାତ୍ରା କଳାକାର ଅଛନ୍ତି । କୋଭିଡ କଟକଣା ଯୋଗୁଁ ଯାତ୍ରା ବନ୍ଦ ହୋଇଥିବା ବେଳେ କିଛି ସ୍ଥାନୀୟ ବ୍ୟକ୍ତି ମଦ ମାଫିଆଙ୍କ ସହ ମିଶି ନକଲି ମଦକାରଖାନା ଚଳାଇଥିବା ନେଇ ସୂଚନା ମିଳିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
