ବାଲେଶ୍ବର: ବୁଲା ପଶୁଙ୍କ ସେବାରେ ଯୁବ ସମାଜସେବୀ ଶୁଭମ ସାଇ ମହାପାତ୍ର । ରାସ୍ତାରେ ବୁଲୁଥିବା ଗାଈଗୋରୁ ହୁଅନ୍ତୁ କିମ୍ବା କୁକୁର, ଯଦି ସେମାନଙ୍କର କିଛି ରୋଗ ହୁଏ ତେବେ ଶୁଭମ ପାଲଟନ୍ତି ତାଙ୍କ ସାହାରା । ବିଶେଷ ଭାବରେ ବୁଲା ଗୋରୁ ଗାଈ ଅନେକ ସମୟରେ ଅସୁସ୍ଥ ହୋଇ ପଡ଼ିଲେ ସେମାନଙ୍କୁ ଠିକ ସମୟରେ ଚିକିତ୍ସା ମିଳେ ନାହିଁ, ଏହି ସମୟରେ ଶୁଭମ ଯୋଗାଇ ଦେଇଥାନ୍ତି ଉତ୍ତମ ଚିକିତ୍ସା ।
ଯଦି କୌଣସି ସ୍ଥାନରେ ବୁଲା ଗୋରୁ କିମ୍ବା କୁକୁର ଅସୁସ୍ଥ କିମ୍ବା ଦୁର୍ଘଟଣାଗ୍ରସ୍ତ ହୋଇ ପଡ଼ିଥାନ୍ତି ତେବେ ସେଠାରେ ତୁରନ୍ତ ପହଞ୍ଚି ଯାଆନ୍ତି ଶୁଭମ । ସେହିଠାରୁ ଓଡିଶା ସରକାରଙ୍କ ଦ୍ବାରା ପ୍ରଦତ୍ତ ହେଲ୍ପ ଲାଇନରେ ଯୋଗାଯୋଗ କରି ପଶୁ ଡାକ୍ତରଙ୍କ ସହ ଆଲୋଚନ କରିଥାନ୍ତି । ପରେ ଡାକ୍ତର ସେଠାରେ ପହଞ୍ଚି ଚିକିତ୍ସା ଆରମ୍ଭ କରିଥାନ୍ତି । ଆଵଶ୍ୟକସ୍ଥଳେ ଚିକିତ୍ସା ପାଇଁ ବ୍ୟବହାର ହେଉଥିବା ଔଷଧ ଶୁଭମ ନିଜ ପକେଟ ଖର୍ଚ୍ଚରେ କିଣିଥାନ୍ତି। ଶୁଭମଙ୍କ ଏପରି ପ୍ରୟାସ ଯୋଗୁଁ ଅନେକ ଅସୁସ୍ଥ ପଶୁ ସୁସ୍ଥ ହୋଇଛନ୍ତି । ଶୁଭମଙ୍କ ଏହି ସେବା ଆଗାମୀ ଦିନରେ ଜାରି ରହିଲେ ଅନ୍ୟ ଯୁବକଙ୍କୁ ନିଶ୍ଚିନ୍ତ ପ୍ରେରଣା ଯୋଗାଇବ ।
