ବାଲେଶ୍ଵର: ସହରର ସରକାରୀ ଅଫିସ କାନ୍ଥ ଏବେ ରଙ୍ଗୀନ ରଙ୍ଗୀନ ଦିଶୁଛି । ସରକାରୀ କାନ୍ଥ ଓ ପାଚେରୀ ଗୁଡିକରେ ଅନାବଶ୍ୟକ ବିଜ୍ଞାପନ ପୋଷ୍ଟର ମରାଯାଉଥିବା ଅନେକ ସମୟରେ ଦେଖିବାକୁ ମିଳିଥାଏ । ମାତ୍ର ଏବେ ସେସବୁ ଚିତ୍ରରେ ଚମକୁଥିବା ଦେଖିବାକୁ ମିଳୁଛି ।
ରଙ୍ଗତୂଳୀରେ ରଙ୍ଗୀନ ହେଉଛି ବାଲେଶ୍ବର ସହର । ରାସ୍ତାକଡର ସରକାରୀ କାନ୍ଥ ଓ ପାଚେରୀରେ ଅଙ୍କାଯାଉଛି ସଚେତନତା ମୂଳକ ଚିତ୍ର । ସହରର 12ଟି ପ୍ରମୁଖ ସ୍ଥାନର ସରକାରୀ ପାଚେରୀରେ ଅଙ୍କାଯାଉଛି ଅତି ମନଲୋଭା ଚିତ୍ର । ସ୍କୁଲ କାନ୍ଥରେ ଶିକ୍ଷା, ଟ୍ରାଫିକ ଥାନା କାନ୍ଥରେ ଟ୍ରାଫିକ ନିୟମ ଓ ସ୍ଵଛ ଭାରତ ଭଳି ଚିତ୍ର କରାଯାଉଛି । ଏହାସହ ଗାଁ ପରିବେଶ ଓ ପାରମ୍ପରିକ ଚିତ୍ର ମଧ୍ୟ ଅଙ୍କାଯାଉଛି । ଯାହାର ଦାୟିତ୍ବ ନେଇଛନ୍ତି ବାଲେଶ୍ଵର ଚାରୁ ଓ କାରୁକଳା ମହାବିଦ୍ୟାଳୟର ଛାତ୍ରଛାତ୍ରୀ।
ସହରର ସୌନ୍ଦର୍ଯ୍ୟ ବୃଦ୍ଧି ପାଇଁ ଜିଲ୍ଲାପାଳଙ୍କ ନିର୍ଦ୍ଦେଶରେ ମହାବିଦ୍ୟାଳୟର ପିଲାମାନେ ଏପରି କରୁଛନ୍ତି । ତେବେ ପିଲାମାନଙ୍କ ସହ କଲେଜର ଅଧ୍ୟାପକମାନେ ମଧ୍ୟ ସାମିଲ ହେଉଥିବା ଦେଖିବାକୁ ମିଳୁଛି । ସବୁବେଳେ କାନଭାସରେ ଚିତ୍ର ଆଙ୍କୁଥିବା ଏହି ପିଲାମାନେ ଏବେ ଅତି ସୁନ୍ଦର ଭାବେ କାନ୍ଥରେ ମଧ୍ୟ ଚିତ୍ର ଆଙ୍କୁଛନ୍ତି । ଚିତ୍ର ମାଧ୍ୟମରେ ସହରର ସୌନ୍ଦର୍ଯ୍ୟ ବୃଦ୍ଧି ସହ ଲୋକଙ୍କୁ ସଚେତନ କରାଇବା ପାଇଁ ପିଲାମାନଙ୍କ ଏତାଦୃଶ କାର୍ଯ୍ୟ ପ୍ରଶଂସାର ପାତ୍ର ହୋଇଛି।
ତେବେ ଏକାସାଙ୍ଗରେ 12ଟି ଜାଗାରେ ଚିତ୍ର ଆଙ୍କିବା ପାଇଁ ଲାଗୁଥିବା ରଙ୍ଗ, ତୂଳୀର ବ୍ୟବସ୍ଥା ଜିଲ୍ଲାପାଳ କରିଥିବାବେଳେ ପିଲାମାନଙ୍କ ପାଇଁ କଲେଜ ପକ୍ଷରୁ ଖାଇବା ଖର୍ଚ୍ଚ ଯୋଗାଇ ଦିଆଯାଉଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
