ବାଲେଶ୍ବର: ପାଟ୍ରୋଲିଂ ବେଳେ ଏକ ଡମ୍ଫରରୁ ବିପୁଳ ପରିମାଣର ମଦ ଜବତ କରିବା ସହ ଏଥିରେ ସମ୍ପୃକ୍ତ ୩ଜଣଙ୍କୁ ଗିରଫ କରିଛି ଜିଲ୍ଲା ଅବକାରୀ ବିଭାଗ । ଗିରଫ ଅଭିଯୁକ୍ତମାନେ ସେଖ ଆବୁ ରହିମ, ଅନନ୍ତ ମାଝୀ ଓ ରାଜୁ ଚୌଧୁରୀ ବୋଲି ଅବକାରୀ ବିଭାଗ ପକ୍ଷରୁ ସୂଚନା ମିଳିଛି ।
୧୦ ଲକ୍ଷ ଟଙ୍କାର ମଦ ଜବତ, ୩ ଗିରଫ
ମିଳିଥିବା ସୂଚନା ଅନୁସାରେ, ଏକ ଡ଼ମ୍ପର ଯୋଗେ ଦେଶୀ ରନ୍ଧାମଦ ନେଇ କିଛି ବ୍ୟକ୍ତି ମୟୂରଭଞ୍ଜରୁ ବାଲେଶ୍ଵର ଅଭିମୁଖେ ଆସୁଥିବା ଖବର ମିଳିଥିଲା । ସୂଚନା ଆଧାରରେ ସ୍ବତନ୍ତ୍ର ଟିମ ଗଠନ କରାଯାଇ ଜାତୀୟ ରାଜପଥରେ ଜଗି ରହିଥିଲା ଅବକାରୀ ବିଭାଗ । ଅବକାରୀ ଟିମକୁ ଦେଖି ଡ଼ମ୍ପରଟି ଦ୍ରୁତଗତିରେ ଭଦ୍ରକ ଆଡକୁ ମୁହାଁଇଥିଲା। ଅବକାରୀ ବିଭାଗ ଡମ୍ଫରକୁ ପିଛା କରିବା ସହ ଖନ୍ତାପଡ଼ା ଠାରେ କାବୁ କରିବାରେ ସଫଳ ହୋଇଥିଲେ । ଡମ୍ଫର ଭିତରେ 10 ହଜାର ଲିଟର ଦେଶୀ ରନ୍ଧା ମଦ ରଖାଯାଇଥିବା ଜଣାପଡିଥିଲା । ଜବତ ମଦର ଆନୁମାନିକ ମୂଲ୍ୟ 10 ଲକ୍ଷ ଟଙ୍କା ହେବ ବୋଲି ଜଣାପଡିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
