ବାଲେଶ୍ବର: ଜିଲ୍ଲାର ସୋରଠାରେ ଥିବା ଏକ ବୀମା କମ୍ପାନୀର ଶାଖା ବନ୍ଦ ନିଷ୍ପତ୍ତିକୁ ନେଇ ଅସନ୍ତୋଷ ପ୍ରକାଶ ପାଇଛି। ଏହି ବୀମା କମ୍ପାନୀ ବନ୍ଦ ହେବାକୁ ଯାଉଥିବାରୁ ଉପଭୋକ୍ତାମାନେ ସମସ୍ୟା ଭୋଗିବେ ବୋଲି କୁହାଯାଉଛି । ଏହାକୁ ନେଇ ଉପଭୋକ୍ତାମାନେ ଗଭୀର ଅସନ୍ତୋଷ ପ୍ରକାଶ କରିଛନ୍ତି ।
ସୋର ଠାରେ 2012 ମସିହାରେ ନିୟୁ ଇଣ୍ଡିଆ ବୀମା କମ୍ପାନୀର ଏକ ଶାଖା ଉଦଘାଟିତ ହୋଇଥିଲା। ଏହାଦ୍ୱାରା ସୋର ସମେତ ବାହାନଗା, ଖଇରା ଏବଂ ଔପଦା ଆଦି ବ୍ଲକର ଅଞ୍ଚଳବାସୀ ସୁବିଧା ସୁଯୋଗ ପାଇ ପାରୁଥିଲେ । ବୀମା ପାଇଁ ପୂର୍ବରୁ ବାଲେଶ୍ଵର ଦୌଡ଼ିବାକୁ ପଡୁଥିବା ବେଳେ ଏହି ଅସୁବିଧାକୁ ଦୂର କରିବା ପାଇଁ ସୋର ଠାରେ ଶାଖା ଉଦଘାଟିତ ହୋଇଥିଲା । ମାତ୍ର ଏବେ ସେଠାକାର ଶାଖାରେ କର୍ମଚାରୀ ଅଭାବର ଆଳ ଦେଖାଇ ତାହା ଆସନ୍ତା 31 ତାରିଖ ପାଖରୁ ବନ୍ଦ କରିବା ନେଇ ନିଷ୍ପତ୍ତି ନିଆଯାଇଛି ।
ଯାହାକୁ ସହଜରେ ଉପଭୋକ୍ତାମାନେ ଗ୍ରହଣ କରି ପାରୁନାହାନ୍ତି । ପ୍ରତିଟି ବୀମା ସମ୍ବନ୍ଧୀୟ କାର୍ଯ୍ୟ ପାଇଁ ବାଲେଶ୍ଵର ଯିବାପାଇଁ ପଡିବ ଓ ଏଥିପାଇଁ ବୀମା ଏଜେଣ୍ଟ ତଥା ବୀମା ଉପଭୋକ୍ତାମାନେ ସମସ୍ୟା ଭୋଗିବେ ବୋଲି କୁହାଯାଇଛି। ଏନେଇ ଉଚ୍ଚସ୍ତରୀୟ ପଦାଧିକାରୀମାନେ ପୁନଃବିଚାର କରିବା ପାଇଁ ଦାବି ହୋଇଛି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
