ବାଲେଶ୍ୱର: ବୁଦାମୂଳରୁ ଜଣେ ଯୁବକଙ୍କ ମୃତଦେହ ଉଦ୍ଧାର କରିଛି ବାଲେଶ୍ୱର ସଦର ଥାନା ପୋଲିସ । ମୃତକ ଜଣକ ହେଉଛନ୍ତି ଅଙ୍ଗରଗଡ଼ିଆର ହରେକୃଷ୍ଣ ଜେନା । ସେ ବୃତ୍ତିରେ ଜଣେ ପଇଡ ବ୍ୟବସାୟୀ ।ସୂଚନାନୁସାରେ, ଗତ 16 ତାରିଖରେ ହରେକୃଷ୍ଣ ମେଡିକାଲ ଯିବାକୁ କହି ଘରୁ ବାହାରିଥିଲେ । ମାତ୍ର ସେହିଦିନ ଠାରୁ ସେ ଆଉ ଘରକୁ ଫେରିନଥିଲେ । ପରିବାର ଲୋକ ଅନେକ ଖୋଜାଖୋଜି ପରେ ତାଙ୍କୁ ନପାଇବାରୁ ନିରାଶ ହୋଇ ଶିଳ୍ପାଞ୍ଚଳ ଥାନାରେ ନିଖୋଜ ଅଭିଯୋଗ କରିଥିଲେ ।
ତେବେ ଗୁରୁବାର ସକାଳେ ମଡର୍ଣ୍ଣ ଇଞ୍ଜିନିୟରିଂ କଲେଜ ସମ୍ମୁଖ ଜାତୀୟ ରାଜପଥର ବିପରୀତରେ ଥିବା ବିଲକୁ ଜଣେ ବ୍ୟକ୍ତି ଯାଇଥିଲେ । ମାତ୍ର ବିଲରେ ଥିବା ଏକ ବୁଦାମୂଳରୁ ଦୁର୍ଗନ୍ଧ ବାହାରୁଥିବାରୁ ସେଠାକୁ ଦେଖିବାକୁ ଯାଇଥିଲେ । ସେଠାରେ ମୃତଦେହ ପଡିଥିବା ଦେଖି ସେ ପୋଲିସକୁ ସୂଚନା ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ପରେ ବ୍ୟବଚ୍ଛେଦ ପାଇଁ ପଠାଇଛି । ତେବେ ଏହା ହତ୍ୟା ନା ଆତ୍ମହତ୍ୟା ତାହା ଜଣାପଡିନଥିବା ବେଳେ ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଛି ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
