ତବଲାରେ ପୋଖତ ବାଲେଶ୍ବରର ଅଜିତାନନ୍ଦ ଦେବଗୋସ୍ବାମୀ

ସଙ୍ଗୀତର ସ୍ୱର ତାଙ୍କ କାନରେ ବାଜିଲେ ନାଚି ଉଠେ ତାଙ୍କ ହାତ । ତାଙ୍କ ତବଲାର ଶବ୍ଦ ଅନେକଙ୍କୁ ମତୁଆଲା କରେ । ବିନା ତବଲାରେ ସତେ ଯେମିତି ସେ ନିର୍ଜୀବ ପାଲଟି ଯାଆନ୍ତି । ଦିନେ ତବଲା ଉପରେ ହାତ ନରଖିଲେ ତାଙ୍କୁ ଯେମିତି ଏ ଦୁନିଆ ତୁଛ ଲାଗେ । ବାଲେଶ୍ଵର ସହରର ମଠସାହି ଅଞ୍ଚଳର ଅଜିତାନନ୍ଦ ଦେବଗୋସ୍ୱାମୀଙ୍କୁ ନେଇ ଦେଖନ୍ତୁ ଏହି ରିପୋର୍ଟ...

ବାଲେଶ୍ବର: ଏ ହେଉଛନ୍ତି ବାଲେଶ୍ଵର ସହରର ମଠସାହି ଅଞ୍ଚଳର ଅଜିତାନନ୍ଦ ଦେବଗୋସ୍ବାମୀ। ତବଲା ବଜାଇବାରେ ପୋଖତ । ଖାଲି ତବଲା ନୁହେଁ ବିଭିନ୍ନ ପ୍ରକାରର ଜିନିଷ ଯେପରିକି ଡବା, ଟେବୁଲ, ଚେୟାର, ହାତ, ପାଟି ଆଦିରେ ବଜାଇ ବାହାର କରନ୍ତି ବିଭିନ୍ନ ପ୍ରକାରର ସ୍ବର । ସଙ୍ଗୀତର ସ୍ବର ତାଙ୍କ କାନରେ ବାଜିଲେ ନାଚି ଉଠେ ତାଙ୍କ ହାତ। ତବଲାରୁ ଦିନ ଆରମ୍ଭ କରିଥାନ୍ତି ଅଜିତାନନ୍ଦ । ଏ ନିଶା ଆଜିର ନୁହେଁ 14 ବର୍ଷରୁ ତବଲା ପ୍ରତି ତାଙ୍କର ରହିଛି ସ୍ବତନ୍ତ୍ର ଆକର୍ଷଣ । ଯାହା ଦେଖିବା ପରେ ବାଲେଶ୍ଵରର ସାଇ ନୃତ୍ୟ ସଙ୍ଗୀତ ମହାବିଦ୍ୟାଳୟରେ ଭର୍ତ୍ତି କରାଇଥିଲେ ପରିବାର ଲୋକେ । 10 ବର୍ଷର କଠିନ ପରିଶ୍ରମ ଓ ଅଧ୍ୟବସାୟ ପରେ ସଙ୍ଗୀତ ବିଶାରଦ ଓ ସଙ୍ଗୀତ ଭାସ୍କର ଶିକ୍ଷା ଅର୍ଜନ କଲେ ସେ। ଖାଲି ଓଡିଶା ନୁହେଁ, ଚଣ୍ଡିଗଡ ଓ କୋଲକତାରେ ତବଲା ବାଦନ କଳା ମଧ୍ୟ ଶିକ୍ଷାଲାଭ କରିଥିଲେ। ନିଜ ତବଲା ତାଳରେ ମୁଗ୍ଧ ହୋଇଯାଆନ୍ତି ଦର୍ଶକ।

ଏବେ ଅଜିତାନନ୍ଦ ଏକ ଘରୋଇ କଲେଜରେ ଆଡ଼ମିନ ଭାବେ କାର୍ଯ୍ୟରତ ଥିବାବେଳେ ଅନେକ ପିଲାଙ୍କୁ ତବଲା ଶିଖାଉଛନ୍ତି । ତାଙ୍କ ଝିଅ ମଧ୍ୟ ତବଲା ପ୍ରତି ଆକୃଷ୍ଟ ହେବା ଦେଖି ଅଜିତାନନ୍ଦ ତାଙ୍କୁ ବି ଘରେ ତବଲା ଶିଖାଉଛନ୍ତି। ସେ ତବଲାରେ ଟ୍ରେନ ଚାଲିବାର ଶବ୍ଦ ବଜାଇ ପାରିବା ସହ ମୁହଁରେ ମଧ୍ୟ ତବଲା ଶବ୍ଦ ବଜାଇ କାଢିପାରନ୍ତି । ଆଉ ତାଙ୍କର ଏମିତି କଳା ପ୍ରତି ଭଲ ପାଇବା ଦେଖି ପାଖ ପଡ଼ୋଶୀମାନେ ମଧ୍ୟ ଚକିତ ହୋଇଯାଆନ୍ତି। ସକାଳେ ଛାତ ଉପରେ ତାଳ ଅଭ୍ୟାସ କରିଥାନ୍ତି। ତବଲା ସହ ମାଠିଆରେ ମଧ୍ୟ ସେ ବହୁତ ସୁନ୍ଦର ଭାବେ ସ୍ବର ବଜାଇ ପାରନ୍ତି। ଅଜିତାନନ୍ଦଙ୍କ ପାଖରେ ବସି ଥରେ ତବଲାର ତାଳ ଶୁଣିଲେ ମନକୁ ଅପାର ଆନନ୍ଦ ମିଳିବା ସହ ଭୋକ ଭୁଲିଯାନ୍ତି ଲୋକେ। ସତରେ ଏମିତି ଜଣେ ପ୍ରତିଭାବାନ ତବଲା ବାଦକଙ୍କ ପାଇଁ ସାରା ଓଡିଶା ଗର୍ବିତ ।

ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ