ବାଲେଶ୍ବର: ରାଜ୍ୟରେ ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ବିଭିନ୍ନ ସ୍ଥାନରେ ଅଘଟଣ ଘଟୁଛି । ବାଲେଶ୍ବର ବାଳିଆପାଳ ମଧୁପୁରା ଗାଁରେ ଲଗାଣ ବର୍ଷା ଯୋଗୁଁ ପାଚେରୀ ଭୁଶୁଡି ପଡି ଜଣେ ଶିଶୁର ମୃତ୍ୟୁ ହୋଇଥିବା ବେଳେ 2 ଜଣ ଗୁରୁତର ହୋଇଛନ୍ତି । ଯାହାକୁ ନେଇ ପୁରା ଅଞ୍ଚଳରେ ଶୋକର ଛାୟା ଖେଳି ଯାଇଛି ।
ସୂଚନା ଅନୁସାରେ, ବାଲେଶ୍ବର ମଧୁପୁରାରେ ସେକ୍ ଆନସାରଙ୍କ ଘରେ ପରିବାର ଲୋକେ ରାତିରେ ଶୋଇଥିଲେ । ପ୍ରବଳ ବର୍ଷା ଓ ପବନ ଯୋଗୁଁ ବିଳମ୍ବିତ ରାତିରେ ଘର ପାଖରେ ଥିବା ସ୍କୁଲ ଭିତରେ ଥିବା ଏକ ଗଛ ଭାଙ୍ଗି ସ୍କୁଲ ପାଚେରୀ ଉପରେ ପଡିଥିଲା । ପାଚେରୀ ପାର୍ଶ୍ବରେ ଥିବା ଅନସାରିଙ୍କ ଘର ଉପରେ ସମ୍ପୂର୍ଣ୍ଣ ପାଚେରୀ ପଡିଯାଇଥିଲା । ଫଳରେ ଘରେ ଶୋଇଥିବା ପରିବାର ଲୋକେ ଆହତ ହୋଇଥିଲେ । ଆହତଙ୍କୁ ଉଦ୍ଧାର କରାଯାଇ ବାଲିଆପାଳ ମେଡିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ସଙ୍କଟାପନ୍ନ ହେବାରୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଉଥିବା ବେଳେ ରାସ୍ତାରେ ୪ ବର୍ଷର ଶିଶୁପୁତ୍ରର ମୃତ୍ୟୁ ହୋଇଥିଲା ବେଳେ ଅନ୍ୟ ଦୁଇଜଣ ଗୁରୁତର ଥିବା ଜଣାପଡିଛି ।
ଇଟିଭି ଭାରତ, ବାଲେଶ୍ବର
