ନୂଆଦିଲ୍ଲୀ: ହିଣ୍ଡେନବର୍ଗ ରିପୋର୍ଟକୁ ନେଇ ଅଡୁଆରେ ରହିଥିବା ଗୌତମ ଆଦାନୀଙ୍କ ପରିବାରକୁ ଫେରିଛି ଖୁସି । ଆଦାନୀଙ୍କ ପରିବାରରେ ବିବାହ ହେବାକୁ ଯାଉଥିବା ବେଳେ ଖୁସିର ମାହୋଲ ଦେଖିବାକୁ ମିଳିଛି । ଧନୀ ବ୍ୟକ୍ତି ଗୌତମ ଆଦାନୀଙ୍କ ସାନ ପୁଅ ଜିତ ଆଦାନୀଙ୍କ ନିର୍ବନ୍ଧ ଦିବା ଜୈମିନ ଶାହଙ୍କ ସହ ହୋଇଛି । ରବିବାର ଦିନ ଗୁଜୁରାଟର ଅହମ୍ମଦାବାଦରେ ଏହି କାର୍ଯ୍ୟକ୍ରମ ହୋଇଥିଲା । ଏଥିରେ କେବଳ ନିକଟ ସମ୍ପର୍କୀୟ ଏବଂ ପରିବାର ଲୋକେ ଯୋଗଦେଇଥିଲେ । ପ୍ରକାଶଥାଉକି, ଦିବାଙ୍କ ବାପା ଜଣେ ହୀରା ବ୍ୟବସାୟୀ । ଜୈମିନ ଶାହ ସି ଦିନେଶ ଏଣ୍ଡ କମ୍ପାନୀର ମାଲିକ ।
ଜିତ ଆଦାନୀଙ୍କ ନିର୍ବନ୍ଧର କିଛି ଫଟୋ ବର୍ତ୍ତମାନ ସୋସିଆଲ ମିଡିଆରେ ବେସ ଭାଇରାଲ ହେବାରେ ଲାଗିଛି । ଦୁହେଁ ବହୁତ କ୍ୟୁଟ ଦେଖାଯାଉଥିଲେ । ଦୁହେଁ ପାରମ୍ପରିକ ପୋଷାକ ପିନ୍ଧିଥିଲେ । ଓ୍ବାର୍କ ଓଢଣା ସାଙ୍ଗକୁ ନୀଳ ଧଳା ରଙ୍ଗର ଲେହେଙ୍ଗାରେ ଦିବା ନଜର ଆସିଥିବା ବେଳେ ଜିତ ଜ୍ୟାକେଟ ସାଙ୍ଗକୁ ସେରଓ୍ବାନୀରେ ନଜର ଆସିଥିଲେ । ଦୁହେଁ ବହୁତ ସୁନ୍ଦର ଦେଖାଯାଉଥିବା ବେଳେ ଲୋକେ ମଧ୍ୟ ବହୁତ ପସନ୍ଦ କରିଛନ୍ତି ।
କଣ କରନ୍ତି ଜିତ ଆଦାନୀ ? ଜିତ ଆଦାନୀ ଗୌତମ ଆଦାନୀଙ୍କ ସାନପୁଅ ଅଟନ୍ତି । ବଡ ପୁଅର ନାମ କରଣ ଆଦାନୀ ହୋଇଥିବା ବେଳେ ସାନପୁଅର ନାମ ଜିତ ଆଦାନୀ । ବଡପୁଅ କରଣଙ୍କ ବିବାହ ହୋଇସାରିଥିବା ବେଳେ ଏବେ ସାନପୁଅ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ୧୯୯୭ ମସିହା ନଭେମ୍ବର ୭ ତାରିଖରେ ସେ ଜନ୍ମ ଗ୍ରହଣ କରିଥିଲେ । ଜିତ ପେନସିଲଭାନିଆ ବିଶ୍ୱବିଦ୍ୟାଳୟରୁ ସ୍ନାତକ ହାସଲ କରିଛନ୍ତି । ଏହାପରେ ସେ ୨୦୧୯ ମସିହାରେ ଭାରତ ଫେରିଥିଲେ । ଜିତ ତାଙ୍କ ପିତା ଏବଂ ଭାଇଙ୍କ ପରି ବିଜନେସ କରୁଛନ୍ତି । ଆଦାନୀ ଗ୍ରୁପ ଓ୍ବେବସାଇଟ ଅନୁସାରେ, ଜିତ ଆଦାନୀ ଗ୍ରୁଫ ଫାଇନାନ୍ସ ବିଭାଗର ଉପସଭାପତି ।
ଆଦାନୀ ଗ୍ରୁପ ବ୍ୟବସାୟଙ୍କୁ ସମ୍ଭାଳୁଛନ୍ତି ଜିତ ଆଦାନୀ: ୨୦୧୯ ମସିହାରି ଜିତ ଆଦାନୀ ଗ୍ରୁପ ସହ ଜଡିତ ହୋଇ ବ୍ୟବସାୟ କରୁଛନ୍ତି । ବାପାଙ୍କ ସହ ମିଶି ଆଦାନୀ ଗ୍ରୁପର ବ୍ୟବସାୟ ବୁଝୁଛନ୍ତି । ୨୦୨୨ ମସିହାରେ ଜିତଙ୍କୁ ଆଦାନୀ ଗ୍ରୁଫ ଫାଇନାନ୍ସ ବିଭାଗର ଉପସଭାପତି କରାଯାଇଥିଲା । ଦେଶ ଏବଂ ବିଶ୍ବରେ ଆଦାନୀ ଗ୍ରୁପର ବଡ ବ୍ୟବସାୟ ରହିଛି । ଆଦାନୀ ଗ୍ରୁପର ମୁଖ୍ୟତଃ ବନ୍ଦର, ତୈଳ, ଇନ୍ଧନ, ବିଦ୍ୟୁତ ଉତ୍ପାଦନ ଏବଂ କୋଇଲା ଖଣିର ବ୍ୟବସାୟ ରହିଛି ।
୨୦୧୩ ମସିହାରେ ଗୌତମ ଆଦାନୀଙ୍କ ବଡ ପୁଅର ହୋଇଥିଲା ବିବାହ: 2013 ମସିହାରେ କରଣ ଆଦାନୀଙ୍କ ବିବାହ ଦେଶର ଜଣାଶୁଣା ଓକିଲ ସିରିଲ ଶ୍ରଫଙ୍କ ଝିଅ ପରିଧି ସହ ହୋଇଥିଲା । ଦୁହିଁଙ୍କ ବିବାହରେ ପ୍ରଧାନମନ୍ତ୍ରୀ ମଧ୍ୟ ଯୋଗ ଦେଇଥିଲେ । କରଣ ଆଦାନୀ ବର୍ତ୍ତମାନ ଆଦାନୀ ପୋର୍ଟ ଆଣ୍ଡ ସେଜ ଲିମିଟେଡର ସିଇଓ ଅଟନ୍ତି । ତେବେ ବର୍ତ୍ତମାନ ସୁଦ୍ଧା ଦୁହିଁଙ୍କ ବିବାହ ନେଇ କୌଣସି ତାରିଖ ଘୋଷଣା କରାଯାଇନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
