ନୂଆଦିଲ୍ଲୀ: ବୈଶ୍ବିକ ବଜାରରେ ନକରାତ୍ମକ ସଙ୍କେତ ଓ ଘରୋଇ ବଜାରରେ ଅଧିକ ପ୍ରଫିଟ ବୁକିଂ ଯୋଗୁଁ ବୁଧବାର ବି ହ୍ରାସ ସେୟାର ସୂଚକାଙ୍କ । କାରବାର ଆରମ୍ଭରେ ସେନସେକ୍ସ ପ୍ରବଳ ପ୍ରଫିଟ ସହ ଉପରମୁହାଁ ଥିଲାବେଳେ ଶେଷ ସୁ୍ଦ୍ଧା 67 ପଏଣ୍ଟ ଖସିଛି ।
ଦିନର କାରବାରରେ ପ୍ରାୟ 400 ପଏଣ୍ଟ ଉପରକୁ ଯିବା ପରେ ବମ୍ବେ ଷ୍ଟକ ଏକ୍ସଚେଞ୍ଜର 30 ସେୟାର ଆଧାରିତ ସେୟାର ସୂଚକାଙ୍କ ସେନସେକ୍ସ 66.95 ପଏଣ୍ଟ ହ୍ରାସ ହୋଇ 52,482.71 ପଏଣ୍ଟରେ ବନ୍ଦ ହୋଇଛି । ସେହିଭଳି ନ୍ୟାସନାଲ ଷ୍ଟକ ଏକ୍ସଚେଞ୍ଜର 50 ସେୟାର ଆଧାରିତ ନିଫ୍ଟି 26.95 ପଏଣ୍ଟ କମି 15,721.50 ପଏଣ୍ଟରେ ପହଞ୍ଚିଛି ।
ସେନସେକ୍ସରେ ସାମିଲ ସେୟାରରେ ପାୱାର ଗ୍ରୀଡର ସେୟାର ସବୁଠୁ ଅଧିକ ହ୍ରାସ ହୋଇଛି । ଏଥିରେ 1 ପ୍ରତିଶତରୁ ଅଧିକ ହ୍ରାସ ଦେଖିବାକୁ ମିଳିଛି । ଏଥିସହ ବଜାଜ ଫିନସର୍ଭ , ଆଇସିଆଇସିଆଇ ବ୍ୟାଙ୍କ, ଏଚଡିଏଫସି , ଏନଟିପିସି , ଏଚୟୁଏଲ ଓ ଲାର୍ସନ ଆଣ୍ଡ ଟ୍ରୁବ୍ରୋରେ ବି ହ୍ରାସ ହୋଇଛି । ସେପଟେ ଇମ୍ଫୋସିସ , ରିଲାଏନ୍ସ ଇଣ୍ଡଷ୍ଟ୍ରିଜ, ନେସଲେ ଇଣ୍ଡିଆ ଓ ମାରୁତି ସେୟାର ବୃଦ୍ଧି ରେକର୍ଡ କରିଛି ।
କାରବାର ସମୟରେ ସୂଚନା ପ୍ରଯୁକ୍ତିବିଦ୍ୟା , ଧାତୁ ଓ ଗାଡି କମ୍ପାନୀର ସେୟାରରେ କ୍ରୟ ଦେଖିବାକୁ ମିଳିଛି । ଫାର୍ମା କ୍ଷେତ୍ରର କମ୍ପାନୀ ମଜବୁତ ରହିଛି । ସେପଟେ ଅନ୍ତରାଷ୍ଟ୍ରୀୟ ଅଶୋଧିତ ତୈଳ ବେଞ୍ଚମାର୍କ ବ୍ରେଣ୍ଟ କ୍ରୁଡ ଦାମ 0.79 ପ୍ରତିଶତ ବଢି ବ୍ୟାରେଲ ପ୍ରତି 74.87 ଡଲାର ଅଛି ।
