ନୂଆଦିଲ୍ଲୀ: କୋରୋନା ଭାଇରସ ସଙ୍କଟ ମଧ୍ୟରେ ସୁରକ୍ଷିତ ନିବେଶ ଦର୍ଶାଉଥିବା ମୂଲ୍ୟବାନ ଧାତୁ ସୁନା ପୁଣି ଆକାଶଛୁଆଁ । ଦିନକୁ ଦିନ ଯେଉଁଭଳି ଏହାର ଚାହିଦା ସହ ଦାମ ବୃଦ୍ଧି ପାଉଛି ଦୀପାବଳି ସୁଦ୍ଧା 10 ଗ୍ରାମ ପିଛା ସୁନା ଦାମ 52,000 ହଜାର ଟଙ୍କା ଛୁଇଁପାରେ ବୋଲି ବିଶେଷଜ୍ଞ ଆକଳନ କରିଛନ୍ତି ।
ଏପରିକି ବର୍ତ୍ତମାନର ଟ୍ରେଣ୍ଡକୁ ଦୃଷ୍ଟିରେ ରଖିଲେ ଆସନ୍ତା 2 ବର୍ଷରେ 10 ଗ୍ରାମ ସୁନା ଦାମ ସବୁ ରେକର୍ଡ ଭାଙ୍ଗି ଐତିହାସିକ ସ୍ତର 65 ହଜାର ଟଙ୍କା ପର୍ଯ୍ୟନ୍ତ ପହଞ୍ଚିପାରେ ।
ମଲ୍ଟି କମୋଡିଟି ଏକ୍ସଚେଞ୍ଜ (MCX)ରେ ବୁଧବାର ସୁନା ଦାମ 10 ଗ୍ରାମ ପିଛା 48,589 ଟଙ୍କାକୁ ଉଛୁଳିଥିଲା । ଯାହାକି ଏମସିଏକ୍ସରେ ସୁନା ଦାମର ସବୁଠୁ ଉଚ୍ଚା ସ୍ତର । ସେପଟେ ଆନ୍ତର୍ଜାତୀୟ ଫ୍ୟୁଚର ବଜାରରେ ସୁନା ଦାମ ଆଉନ୍ସ ପ୍ରତି 1791.55 ଡଲାରକୁ ବୃଦ୍ଧି ପାଇଛି । ଯାହାକି 2012 ପରେ ସର୍ବୋଚ୍ଚ ସ୍ତର ।
କୋରୋନା ମହାମାରୀ ପ୍ରକୋପ ପୁଣି ବଢିବା ସହ ଆର୍ଥିକ ଗତିବିଧି ପ୍ରଭାବିତ ଆଶଙ୍କା ବଢିଛି । ଏଥିମଧ୍ୟରେ ଆଇଏମଏଫର ଅଭିବୃଦ୍ଧି ହାର ହ୍ରାସ ନେଇ ଆକଳନ କରିଛି । ଯାହା ଦ୍ବାରା ନିବେଶକ ସୁରକ୍ଷିତ ନିବେଶ ପ୍ରତି ମନ ବଳାଉଛନ୍ତି । ଯାହା ଫଳରେ ସୁନାର ଦାମ ବଢିଚାଲିଛି ବୋଲି କମୋଡିଟି ବଜାରର ବିଶେଷଜ୍ଞ କହିଛନ୍ତି ।
