ନୂଆଦିଲ୍ଲୀ: ଲୋକଙ୍କୁ ଆତ୍ମନିର୍ଭରଶୀଳ କରିବା ପାଇଁ ସରକାର ଆରମ୍ଭ କରିଥିଲେ ମୁଦ୍ରା ଋଣ ଯୋଜନା । ହେଲେ ଏବେ ଏହା ବ୍ୟାଙ୍କର ଅନାଦେୟ ଋଣ ଭାରକୁ ବଢାଇଦେଇଛି । ଫଳରେ ବ୍ୟାଙ୍କ କାରବାର ମାତ୍ରାଧିକ ଭାବେ ପ୍ରଭାବିତ ହେବା ସହ ଋଣ କ୍ଷମତା ମଧ୍ୟ କମୁଛି । ମଙ୍ଗଳବାର ଏ ନେଇ ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ଚିନ୍ତା ପ୍ରକାଶ କରିଛନ୍ତି ।
ଏଥିଲାଗି ଏହି ଋଣଗୁଡିକର ଯାଞ୍ଚ ପାଇଁ ବ୍ୟାଙ୍କଗୁଡିକୁ ଆରବିଆଇ ନିର୍ଦ୍ଦେଶ ଦେଇଛି । ଡେପ୍ୟୁଟି ଗଭର୍ଣ୍ଣର ଏମ କେ ଜୈନ ମୁଦ୍ରା ଋଣର ପ୍ରତ୍ୟେକ ଦିଗକୁ ନେଇ ବିଚାର ବିମର୍ଶ କରିଛନ୍ତି । ଋଣ ବଦଳରେ ଏନପିଏ ବୃଦ୍ଧି କାହିଁକି ହେଉଛି ? ଏଥିପାଇଁ ଜବାବ ରଖିବାକୁ ସେ ବ୍ୟାଙ୍କକୁ କହିଛନ୍ତି । ପ୍ରକାଶ ଯେ, ମୁଦ୍ରା ଋଣ ଏବେ ପ୍ରାୟ 321 ଲକ୍ଷ କୋଟି ଟଙ୍କା ପାର କଲାଣି । ହେଲେ ଆଦାୟ ଏହା ତୁଳନାରେ ବହୁତ କମ ହେଉଛି । ଯେଉଁଥିପାଇଁ ବ୍ୟାଙ୍କ ବ୍ୟବସ୍ଥା କ୍ରମଶଃ ବିଗିଡିବାରେ ଲାଗିଛି ।
ଭାରତୀୟ ଲଘୁ ଉଦ୍ୟୋଗ ବିକାଶ ବ୍ୟାଙ୍କ(ସିଡବୀ)ର ଏକ କାର୍ଯ୍ୟକ୍ରମକୁ ସମ୍ବୋଧନ କରି ଜୈନ କହିଛନ୍ତି ଯେ,‘ମୁ୍ଦ୍ରା ଯୋଜନା ଉପରେ ଆମର ନଜର ରହିଛି । ଏହା ଦ୍ବାରା ବହୁ ଲୋକ ଦାରିଦ୍ର୍ୟରୁ ମୁକୁଳିପାରିଛନ୍ତି । ଯାହାକି ବହତ ଭଲ କଥା । ହେଲେ ଏଥିରେ ଅନାଦେୟ ଋଣ ବୋଝ ବଢିବା ଆଦୌ ଭଲ ସଙ୍କେତ ନୁହେଁ । ଏଣୁ ଯେଉଁମାନଙ୍କୁ ଋଣ ଦିଆଯାଉଛି , ସେମାନଙ୍କୁ ତାର ସଦୁପଯୋଗ ପାଇଁ ମଧ୍ୟ ଶିଖାଇବା ଦରକାର । ଯଦି ପ୍ରତ୍ୟେକ ଋଣକୁ ସଠିକ ପ୍ରଣାଳୀରେ ଯାଞ୍ଚ କରିବା ଦ୍ବାରା ତାହା ଏନପିଏମରେ ପରିଣତ ହେବନି ।’
