ନୂଆଦିଲ୍ଲୀ: 2021-22 ବଜେଟ ପାଇଁ ଆସନ୍ତା 16ରୁ ପ୍ରସ୍ତୁତି କାମ ଆରମ୍ଭ ହେବ । ଏ ନେଇ ଅର୍ଥ ମନ୍ତ୍ରାଳୟ ପକ୍ଷରୁ ପ୍ରକାଶିତ ଏକ ବିଜ୍ଞପ୍ତିରେ ସୂଚନା ଦିଆଯାଇଛି ।
ମୋଦି ସରକାରଙ୍କ ଦ୍ବିତୀୟ ପାଳିର ସରକାର ଏବଂ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଏହା ତୃତୀୟ ବଜେଟ ହେବ । ତେବେ କୋରୋନା ମହାମାରୀ ଯୋଗୁଁ ଦେଶର ଜିଡିପି ତଳମୁହାଁ ଓ ଆର୍ଥିକ ପରିଦୃଶ୍ୟ ନକରାତ୍ମକ ଥିବାରୁ ଏଥର ବଜେଟ ଉପରେ ରହିଛି ସମସ୍ତଙ୍କ ନଜର ।
ସେହିଭଳି କୋଭିଡ ଯୋଗୁଁ ରାଜସ୍ବ ପ୍ରବଳ ମାତ୍ରାରେ ହ୍ରାସ ହୋଇଛି । ବିଭିନ୍ନ ସେକ୍ଟରର ଗତିବିଧି ଧୀମା ପଡିଛି । ଅଭିବୃଦ୍ଧି ହାର ଆଶା ଠାରୁ ପ୍ରବଳ ଖସିଛି । ଏଭଳି ସ୍ଥିତିରେ ସବୁ ସେକ୍ଟରକୁ ସୁହାଇଲା ଭଳି ବଜେଟ ଆଣିବା ଚ୍ୟାଲେଞ୍ଜିଂ ହେବ । ତେବେ ଆସନ୍ତା 16ରୁ ଏଥିପାଇଁ ପ୍ରାକ ବଜେଟ ବୈଠକ ସବୁ ଆରମ୍ଭ ହେବ ବୋଲି ଅର୍ଥନୈତିକ ବ୍ୟାପର ବିଭାଗର ବଜେଟ ଡିଭିଜନ ପକ୍ଷରୁ ପ୍ରକାଶିତ ଏକ ସର୍କୁଲାରରେ କୁହାଯାଇଛି । ଏହା ନଭେମ୍ବର ପ୍ରଥମ ସପ୍ତାହ ଯାଏଁ ଚାଲିବ ।
2021-22 ପାଇଁ ବଜେଟ ଆଗତ ଆସନ୍ତା ବର୍ଷ ଫେବୃଆରୀ ପହିଲାରେ ହୋଇପାରେ ।
