ନୂଆଦିଲ୍ଲୀ: ଦେଶବ୍ୟାପି ଲକଡାଉନ ମଧ୍ୟରେ କମ୍ପାନୀଙ୍କୁ ଆଶ୍ବସ୍ତି ଦେଇଛି କର୍ମଚାରୀ ଭବିଷ୍ୟ ନିଧି ସଙ୍ଗଠନ(ଇପିଏଫଓ) । ଏହା ଅନୁଯାୟୀ ଏବେ ନିଯୁକ୍ତିଦାତା ମାର୍ଚ୍ଚର ଇପିଏଫ ଏବଂ ଅନ୍ୟାନ ସାମାଜିକ କଲ୍ୟାଣ ଯୋଜନାର ଯୋଗଦାନ ମେ 15 ଯାଏଁ କରିପାରିବ ।
ଇପିଏଫର ଏହି ନିଷ୍ପତ୍ତି ଦ୍ବାରା 6 ଲକ୍ଷ କମ୍ପାନୀ ତଥା 5 କୋଟିରୁ ଉର୍ଦ୍ଧ୍ବ ଅଂଶଧାରଙ୍କୁ ରିଲିଫ ମିଳିବ । ଇପିଏଫର ସାମାଜିକ ସୁରକ୍ଷା ଯୋଜନାରେ ମାର୍ଚ୍ଚ ମାସର ଯୋଗଦାନ ପେମେଣ୍ଟ ଡେଡଲାଇନ ଏପ୍ରିଲ 15 ରହିଥିଲା । କିନ୍ତୁ ସ୍ଥିତିକୁ ନଜରରେ ରଖି ଏବେ ଏହାକୁ ବଢାଯାଇଛି ।
ଶ୍ରମ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ, "କୋରୋନାଭାଇରସ ରୋକିବାକୁ ଏହା ଜାରି ହୋଇଛି । ଏଭଳି ଅପ୍ରତ୍ୟାଶିତ ପରିସ୍ଥିତିକୁ ଦୃଷ୍ଟିରେ ରଖି ମାର୍ଚ୍ଚ ମାସର ଦରମା ପାଇଁ ଇଲେକ୍ଟ୍ରୋନିକ ଚାଲାଣ ସହ ରିଟର୍ଣ୍ଣ (ECR) ଦାଖଲ କରିବା ତାରିଖ 2020 ମେ 15 ଯାଏଁ କରାଯାଇଛି । ଏହି ନିୟମ ସେମାନଙ୍କ ପାଇଁ, ଯେଉଁମାନେ କର୍ମଚାରୀମାନଙ୍କୁ ମାର୍ଚ୍ଚ ମାସର ଦରମା ଦେଇ ସାରିଛନ୍ତି ।"
