ନୂଆଦିଲ୍ଲୀ: ଦୁନିଆର ସର୍ବବୃହତ୍ତ ସୋଲାର ପାୱାର ପ୍ଲାଣ୍ଟ ପ୍ରୋଜେକ୍ଟ ବିଡ ଜିତିଛନ୍ତି ଗୌତମ ଅଦାନୀଙ୍କ କମ୍ପାନୀ ଅଦାନୀ ଗ୍ରୀନ ଏନର୍ଜି ଲିମିଟେଡ(Adani Green Energy Limited) । ଏହା ଅନୁଯାୟୀ ଅଦାନୀଙ୍କ କମ୍ପାନୀ 8,000 ମେଗାୱାଟର ଫୋଟୋଭୋଲ୍ଟେକ(Photovoltaic) ପାୱାର ପ୍ଲାଣ୍ଟ ନିର୍ମାଣ କରିବ । ଏହା ଦ୍ବାରା ପ୍ରତ୍ୟକ୍ଷ ଓ ପରୋକ୍ଷ ଭାବେ 4 ଲକ୍ଷ ଲୋକଙ୍କୁ ନିଯୁକ୍ତି ମିଳିପାରିବ ।
ଏଥିସହ 2000 ମେଗାୱାଟର ଡୋମେଷ୍ଟିକ ସୋଲାର ପ୍ୟାନେଲ ମଧ୍ୟ ଅଦାନୀଙ୍କ କମ୍ପାନୀଙ୍କୁ ପ୍ରସ୍ତୁତ କରିବାକୁ ପଡିବ । ବର୍ତ୍ତମାନ ସମୟରେ ଭାରତରେ ସୋଲାର ସେଲ ମ୍ୟାନୁଫେକ୍ଚରିଙ୍ଗ କ୍ଷମତା 3300 ମେଗାୱାଟ ଓ ମଡ୍ୟୁଲ ତିଆରି କ୍ଷମତା 8000 ମେଗାୱାଟ ରହିଛି ।
ଅଦାନୀ ଗ୍ରୀନ ଏନର୍ଜି ଏହି ଟେଣ୍ଡରକୁ 6 ଅରବ ଡଲାର (45,300 କୋଟି ଟଙ୍କା) ର ବିଡ ଲଗାଇ ହାସଲ କରିଛି । ଏହି ଟେଣ୍ଡର ପାଇଁ ଗତ ବର୍ଷ ନଭେମ୍ବରରେ ବିଡ ଦାଖଲ ହୋଇଥିଲା । ଯାହାର ଫଳାଫଳ ଏବେ ପ୍ରକାଶ ପାଇଛି ।
ଏହା ବ୍ୟତୀତ ଅଜ୍ୟୁର ପାୱର(Azure Power)କୁ ମଧ୍ୟ 4000 ମେଗାୱାଟର ଫୋଟୋଭୋଲ୍ଟେକ ପାୱାର ପ୍ଲାଣ୍ଟ ତିଆରି ପାଇଁ ଟେଣ୍ଡର ମିଳିଛି । ଏଥିସହ କମ୍ପାନୀ 1000 ମେଗାୱାଟ କ୍ଷମତାର ସୋଲାର କିଟ ମଧ୍ୟ ପ୍ରସ୍ତୁତ କରିବ ।
