ନୂଆଦିଲ୍ଲୀ: ଟିଭି ଚ୍ୟାନେଲ ବାଛିବା ପାଇଁ ଗୁରୁବାର ଏକ ଆପ ଉପସ୍ଥାପନ କରିଛି ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ (ଟ୍ରାଇ) । ଏହି ଆପ ଗ୍ରାହକଙ୍କୁ ସେମାନଙ୍କ ପସନ୍ଦର ଚ୍ୟାନେଲ ଚୟନ ଓ ନାପସନ୍ଦ ଚ୍ୟାନେଲକୁ ହଟାଇବା ପାଇଁ ସାହାଯ୍ୟ କରିବ ।
ଟ୍ରାଇ ଏକ ବିବୃତ୍ତିରେ କହିଛି ଯେ, ପ୍ରସାରଣ ସେବା ପାଇଁ ନୂଆ ଦର ସ୍ଥିର କରିବା ପରଠୁ ଗ୍ରାହକ ସେମାନଙ୍କ ସେବାପ୍ରଦାନକାରୀଙ୍କ ୱେବ ପୋର୍ଟାଲ କିମ୍ବା ଆପରେ ଟିଭି ଚ୍ୟାନେଲ ଚୟନ କିମ୍ବା ଅପସାରଣ ନେଇ ଅସୁବିଧାର ସମ୍ମୁଖୀନ ହେଉଛନ୍ତି ।
ଏନେଇ ମାମଲା ସାମ୍ନାକୁ ଆସିବା ପରେ ଟ୍ରାଇ ଏହି ଆପ ବିକଶିତ କରିଛି । ଯାହାକି ସମସ୍ତ ବିତରଣ ପ୍ଲାର୍ଟଫର୍ମ ପରିଚାଳକ (ଟିଭି ଚ୍ୟାନେଲ ସେବା ପ୍ରଦାନକାରୀ)ଙ୍କ ଠାରୁ ସୂଚନା ନେଇ ଗୋଟିଏ ସ୍ଥାନରେ ଉପଲବ୍ଧ କରାଇବ ।
ଟ୍ରାଇ କହିଛି କି ଯେ, ଏହି ଆପରେ ବଡ DTH ସେବା ପ୍ରଦାନକାରୀ, ମଲ୍ଟି ସିଷ୍ଟମ୍ ଅପରେଟର (MSOs / କେବୁଲ୍ ଅପରେଟର) ଙ୍କ ବିଷୟରେ ସୂଚନା ରହିଛି । ତେବେ ଅନ୍ୟ ସେବା ପ୍ରଦାନକାରୀଙ୍କ ସୂଚନା ମଧ୍ୟ ଏଥିରେ ଯୋଡିବାକୁ ପ୍ରୟାସ କରାଯାଉଛି ।
ନିୟାମକ କହିଛି କି ଟିଭି ଗ୍ରାହକଙ୍କୁ ସ୍ୱଚ୍ଛ ଏବଂ ନିର୍ଭରଯୋଗ୍ୟ ସିଷ୍ଟମ ଯୋଗାଇବା ଉଦ୍ଦେଶ୍ୟରେ 'ଟିଭି ଚ୍ୟାନେଲ ସିଲେକ୍ଟର ଆପ୍' ବିକଶିତ କରାଯାଇଛି । ଆପ ରେ ଥିବା ସମସ୍ତ ଉପଭୋକ୍ତାଙ୍କ ପରିଚୟ ଯାଞ୍ଚ ଓଟିପି ଜରିଆରେ କରାଯିବ । ଏହା ସେମାନଙ୍କ ପଞ୍ଜୀକୃତ ମୋବାଇଲ୍ ନମ୍ବରକୁ ପଠାଯିବ। ଯଦି ଜଣେ ଉପଭୋକ୍ତା ସେବା ପ୍ରଦାନକାରୀଙ୍କ ସହିତ ତାଙ୍କ ନମ୍ବର ପଞ୍ଜୀକୃତ କରିନାହାଁନ୍ତି, ତେବେ ଏହି OTP ତାଙ୍କ ଟିଭି ପରଦାରେ ଦେଖାଯିବ ।
ଏହି ଆପ ଗୁଗୁଲ ପ୍ଲେ ଷ୍ଟୋର ଓ ଆପଲ ପ୍ଲେ ଷ୍ଟୋରରେ ମଧ୍ୟ ଉପଲବ୍ଧ ରହିଛି ।
