ନୂଆଦିଲ୍ଲୀ: ଆମେରିକା ସହ ବାଣିଜ୍ୟିକ ଯୁଦ୍ଧ ଯୋଗୁଁ ଧୀମେଇପଡିଥିବା ଚୀନ ଅର୍ଥନୀତିକୁ ଆଉ ଏକ ଚଡକ। କୋରିଆର ଜଣାଶୁଣା ଇଲେକ୍ଟ୍ରୋନିକ କମ୍ପାନୀ ସାମସଙ୍ଗ ଏବେ ଚୀନରେ ଉତ୍ପାଦନ ବନ୍ଦ କରିଦେଇଛି । ଚୀନର ମହଙ୍ଗା ଶ୍ରମଶକ୍ତି ଯୋଗୁଁ କମ୍ପାନୀ ଏଭଳି ନିଷ୍ପତ୍ତି ନେଇଛି।
କମ୍ପାନି ଏବେ ଭାରତ ଏବଂ ଭିଏତନାମକୁ ପ୍ଲାଣ୍ଟ ସ୍ଥାନାନ୍ତର କରିବା ପାଇଁ ବିଚାର କରୁଛି । ଜୁନରେ ସାମସଙ୍ଗ ଚୀନର ଦକ୍ଷିଣାଞ୍ଚଳର ହୁଇଝୋସ୍ଥିତ ପ୍ଲାଣ୍ଟରେ ଉତ୍ପାଦନ କମାଇଥିଲା । ସେହିପରି ଗତବର୍ଷ ଅନ୍ତରେ ଏହା ଆଉ ଏକ ଫ୍ୟାକ୍ଟ୍ରି ବନ୍ଦ କରିଥିଲ । କେବଳ ସାମସଙ୍ଗ ନୁହେଁ ଏପରି ବହୁ କମ୍ପାନି ଏବେ ଚୀନରୁ ମୁହଁ ଫେରାଇ ଅନ୍ୟ ଦେଶରେ କାରବାର ପାଇଁ ପ୍ରସ୍ତୁତ ହେଲେଣି । କାରଣ ଚୀନରେ ଚାଲିଥିବା ମାନ୍ଦାବସ୍ଥା ଯୋଗୁଁ ଶ୍ରମ ଖର୍ଚ୍ଚ ଅଧିକ ବଢୁଛି। ଫଳରେ ଏଠାରେ କାରବାର କ୍ଷତିଦାୟକ ବୋଲି କମ୍ପାନୀ ଚିନ୍ତା କଲେଣି।
ଏହାର ଫାଇଦା ନେଇ ଭାରତ ବି ଏହି ସବୁ କମ୍ପାନୀକୁ ଆକୃଷ୍ଟ କରିବାକୁ ଲାଗିପଡିଛି । କର୍ପୋରେଟ ଟିକସ ହ୍ରାସ କରି ନିବେଶ ପାଇଁ ସୁଯୋଗ ସୃଷ୍ଟି କରୁଛି । ଏହା ବ୍ୟତୀତ କମ୍ପାନୀକୁ ପ୍ରୋତ୍ସାହିତ କରିବାକୁ ଇଲେକ୍ଟ୍ରୋନିକ ମ୍ୟାନୁଫ୍ୟାକ୍ଚରିଂ ଉପରେ ବଡ ରିହାତି ଦେବାକୁ ସରକାର ଯୋଜନା କରୁଛନ୍ତି।
