ନୂଆଦିଲ୍ଲୀ: କଳା ଧନର ଖଣି ସ୍ବିସ ବ୍ୟାଙ୍କ । ଟିକସ ଫାଙ୍କିବା ଉଦ୍ଦେଶ୍ୟରେ ବହୁ ରାଷ୍ଟ୍ରର କୋଟିପତି ଏଠାରେ ଜମା କରନ୍ତି ପେଟି ପେଟି ଟଙ୍କା । ହେଲେ ଏହାର ପର୍ଦ୍ଦାଫାସ କରିବାରେ ଭାରତୀୟ ସରକାର ଜୋରସୋରରେ ଲାଗିପଡିଛନ୍ତି । ଏଥିଯୋଗୁଁ କଳାଧନ ଜମା କରିବାରେ କମିଛି ଭାରତୀୟଙ୍କ ସଂଖ୍ୟା । ଏହି ରେସରେ ଭାରତ ଏବେ74 ନମ୍ବରକୁ ଖସିଛି । ଆଗରେ ବିଟ୍ରେନ ରହିଛି ।
ସ୍ବିଜରଲ୍ୟାଣ୍ଡର କେନ୍ଦ୍ରୀୟ ବ୍ୟାଙ୍କ ସ୍ବିସ ନ୍ୟସନାଲ ବ୍ୟାଙ୍କ(ଏସଏନବି) ପକ୍ଷରୁ ପ୍ରକାଶିତ ତଥ୍ୟରେ ଏ ନେଇ ଦର୍ଶାଇଛି । ଏହା ଅନୁଯାୟୀ, ଗତ ବର୍ଷ ଭାରତ 15ଟି ସ୍ଥାନ ଉପରକୁ ଉଠି 73 ସ୍ଥାନରେ ପହଞ୍ଚିଥିଲା । ଏହା ପୂର୍ବରୁ ଭାରତ 88 ନମ୍ବରରେ ରହିଥିଲା ।
ଏସଏନବି ରିପୋର୍ଟ ମୁତାବକ, ସ୍ବିସ ବ୍ୟାଙ୍କରେ ଧନ ଜମା କରିବାରେ ଭାରତୀୟ ବହୁ ପଛରେ ରହିଛି । ଏଠାରେ ବିଦେଶୀଙ୍କ ଦ୍ବାରା ଜମା ମୋଟ ଟଙ୍କା ମଧ୍ୟରେ ଭାରତୀୟଙ୍କ 0.07 ଭାଗ ରହିଛି । 2018 ଶେଷ ସୁଦ୍ଧା ସ୍ବିସରେ ଜମା ମୋଟ ଟଙ୍କାର 26 ପ୍ରତିଶତ ଧନ ବ୍ରିଟେନ ଲୋକଙ୍କ ରହିଛି । ବ୍ରିଟେନ ପରେ ଆମେରିକା ଏହି ତାଲିକାର ଦ୍ବିତୀୟରେ ରହିଛି । ସେହିଭଳି ତୃତୀୟରେ ୱେଷ୍ଟଇଣ୍ଡିଜ, ଚତୁର୍ଥରେ ଫ୍ରାନ୍ସ ଓ ପଞ୍ଚମରେ ହଂକଂ ଅଛି । ଏଥିରୁ ଜଣାପଡିଛି ଯେ, ସ୍ବିସରେ ଜମା ମୋଟ ଟଙ୍କାର 50 ପ୍ରତିଶତ ଟଙ୍କା ଏହି 5 ଟି ଦେଶର ସର୍ବାଧିକ ।
