ନୂଆଦିଲ୍ଲୀ: ଆମେରିକାର କଠୋର ବ୍ୟବହାରର ଜବାବ ଦେଇଛି ଭାରତ । ଟ୍ରମ୍ପ ପ୍ରଶାସନ ଭାରତ ଠାରୁ ଜିଏସପି(କରମୁକ୍ତ ତାଲିକା) ପ୍ରତ୍ୟାହୃତ କରିବା ପରେ ଯେସାକୁ ତେସା ନୀତି ଆପଣାଇଛନ୍ତି ମୋଦି ସରକାର । ପାଲଟା ଉତ୍ତରରେ ଆମେରିକାର 29ଟି ସାମଗ୍ରୀ ଉପରେ ଟିକସ ଲଗାଇବାକୁ ନିଷ୍ପତ୍ତି ନେଇଛନ୍ତି। ଏହାକୁ ଆସନ୍ତା 16 ତାରିଖରୁ ଲାଗୁ କରାଯିବା ନେଇ ସୂଚନା ମିଳିଛି।
ଆମରିକା ପଠାଉଥିବା କେତେକ ବସ୍ତୁ ଉପରେ ଉତ୍ପାଦ ଶୁଳ୍କ ଲଗାଇବାକୁ ଗତ ବର୍ଷ ମେ ମାସରେ ସରକାର ନିଷ୍ପତ୍ତି ନେଇଥିଲେ । ହେଲେ ଏହାର ସମାୟସୀମାକୁ ବୃଦ୍ଧି କରାଯାଉଥିବାରୁ ଏହା ବିଳମ୍ବ ହେଉଥିଲା । ଏବେ ଆମେରିକାର କଠୋର ଆଭିମୁଖ୍ୟ ପରେ ଭାରତ ସରକାର ମଧ୍ୟ ଆଉ ଚୁପ ବସିନାହାନ୍ତି । ଏବେ ଭାରତ ମଧ୍ୟ ବହୁ ବସ୍ତୁ ଉପରେ ଉଚ୍ଚା କର ଲଗାଇବାକୁ ଅଧିସୂଚନା ଜାରି କରିବେ ବୋଲି ଅର୍ଥମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି।
ଆମେରିକା ଭାରତ ଠାରୁ ଆମଦାନୀ କରୁଥିବା ଇସ୍ପାତ ଓ ଆଲୁମିନିୟମ ଉତ୍ପାଦ ଉପରେ ଶୁଳ୍କ ବଢାଇଦେଇଛି । ପ୍ରତି ଜବାବରେ ଭାରତ ମଧ୍ୟ କିଛି ବସ୍ତୁ ଜରିଆରେ ଆମେରିକା ଠାରୁ 3ରୁ 4 ଗୁଣ କର ଆଦାୟ କରିବ । ଏଥିରେ ଅଖରୋଟ, କାବୁଲି ଚଣା, ମସୁର ଡାଲି ଆଦି ରହିଛି। 2017-18 ଆର୍ଥିକ ବର୍ଷରେ ଭାରତ ଆମେରିକାକୁ 47.9 ଅରବ ଡଲାର ବସ୍ତୁ ରପ୍ତାନୀ କରିଥିଲା।
